- 小森：
- 點解你呢兩日都着到「青嗶嗶」？
- 阿四：
- 乜你睇唔出我呢身綠色嘅造型，係配合返星期四（六月十四日）舉辦嘅「ICMA綠色及社會責任債券原則年會」，同埋今日金管局同人民銀行合辦嘅「內地與香港綠色金融合作研討會」咩？
- 小森：
- 呢兩場大型會議係香港綠色金融界嘅盛事，吸引咗大約一千三百名來自多邊機構、跨國銀行、資產管理人、監管業界同大型企業等嘅高層代表出席，台上台下嘅氣氛都好熱烈。綠色金融近年起飛，香港作為國際金融中心，當然要主動出擊，爭取多啲中外資金投入綠色金融活動。
- 阿四：
- 查實綠色金融同一般金融有乜唔同？
- 小森：
- 講明「綠色」就梗係同環保有關！綠色金融所籌集嘅資金都必須投放喺有助社會可持續發展、減少碳排放、紓緩氣候變化嘅項目，包括風力同太陽能發電呢類可再生能源、低碳建築同交通項目等。呢啲綠色項目愈來愈「紅」，甚至有專門投資綠色項目嘅基金㗎。今年唔夠6個月，香港就發行咗50億美元綠色債券，多過舊年全年約20億美元嘅發行規模。
- 阿四：
- 聽聞綠色金融嘅認證標準都幾嚴謹。
- 小森：
- 無錯。綠色金融產品多數都會由獨立評估機構確認項目夠「綠」，同埋確保集資後嘅資金用返喺綠色項目。香港品質保證局喺今年1月開始提供綠色金融認證計劃，令投資者對喺香港發行嘅綠色金融產品有更大信心。
- 阿四：
- 嚟緊另一個焦點，當然係政府計劃推出嘅一千億港元綠色債券計劃，金管局將會負責發行同推廣，到時再同大家分享詳情。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
