當電子錢包遇上收銀車

小森阿四專欄

2018年04月13日

當電子錢包遇上收銀車

 

阿四:
(檢查隨身用品)收銀車日程表,查咗!一大袋「神沙」,帶齊!銀包,帶咗!

 

小森:
你準備去邊要咁大陣仗?

 

阿四:
我打算一陣去收銀車一趟。你都知我大頭蝦,上次去收銀車無帶八達通,入完「神沙」,要攞現金走,有點「老套」!

 

小森:
乜你唔知咩,由今個星期二(四月十日)開始,收銀車會提供更多選擇畀大家。市民可以用QR Code將硬幣增值到支付寶香港、八達通O! ePay、拍住賞、TNG Wallet同埋WeChat Pay嘅五個電子錢包。我哋陳總裁當日喺百忙中都抽出時間支持!(見圖)

 

阿四:
以後用硬幣增值就更加方便,帶部手機就行得!

 

小森:
我仲聽講兩部收銀車原來已經為全港18區市民服務咗三年半呀,好受大眾歡迎,期間為40萬六千人次提供服務,合共收集3.4億枚總面值4.53億港元嘅硬幣。

 

阿四:
嘩!收銀車每日收咁多「神沙」,最後會去咗邊?

 

小森:
見你突然咁好學就話你聽啦。其實收銀車每日收工返廠之後,保安公司職員會核對所收集嘅硬幣數目,然後硬幣會回流金庫同供應畀需要「神沙」找續嘅公司,例如超市同便利店,有助加速硬幣嘅流轉,減少鑄造新幣,又符合環保原則,一舉多得。

 

阿四:
咁係咪所有香港硬幣數銀機都吞㗎?

 

小森:
生銹或發霉發黑嘅硬幣,因為會影響數銀機嘅正常操作,職員會事先目測拎起退還市民。另外,數銀機只會回收現時嘅流通硬幣,所以舊款嘅硬幣例如十角形嘅五蚊銀亦會退回。

 

阿四:
古董喎,儲起佢好過啦!

 

小森:
記住去之前睇清楚金管局網頁(coincollection.hkma.gov.hk) 嘅收銀車日程表,有時收銀車會例行維修,白行一趟就唔好啦!

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年04月13日