- 阿四：
- 我早排提議爸爸媽媽申請按揭證券公司嘅安老按揭計劃，將佢哋住緊個單位抵押，每個月「有糧出」，點知佢哋好抗拒。
- 小森：
- 點解呀？安老按揭係好嘢嚟喎。
- 阿四：
- 佢哋擔心百年歸老之後，層樓被銀行收咗，無得留返畀我。
- 小森：
- 世伯伯母好錫你喎！其實安老按揭只係透過按揭證券公司嘅安排，將層樓抵押畀銀行貸款，而呢筆錢唔係一次過畀，而係分期甚至終身支付，世伯伯母仍然係單位業主。根據安排，佢兩位唔喺度時，佢哋嘅繼承人，亦即係阿四你，係可以優先贖返層樓㗎。
- 阿四：
- 贖回價格點計？
- 小森：
- 你只需清還兩老喺安老按揭計劃下嘅貸款總結欠，就可以贖樓。舉個例子，假如貸款總結欠係二百萬元，無論單位當時市值係幾多，用二百萬元就可以贖返樓。
- 阿四：
- 如果唔贖呢？
- 小森：
- 一般情況下，銀行就會賣樓。假如兩老的安老按揭貸款總結欠二百萬元，銀行賣樓收到八百萬元，扣除貸款後淨返六百萬會畀返繼承人。
- 阿四：
- 萬一賣樓嘅錢唔夠冚貸款額，咁點算？
- 小森：
- 按揭證券公司同銀行之間有保險安排㗎嘞，唔會向繼承人追收，所以唔使擔心。
- 阿四：
- 我知道安老按揭計劃嘅年金期分為十、十五、二十年或終身每月收錢。假設我父母揀咗十年，但十年後佢哋仲健在，佢哋係咪要搬走㗎？
- 小森：
- 唔使，即使年金派完都好，佢哋都可以喺抵押單位住到百年歸老為止。其實已經有好多老友記用咗安老按揭計劃，去年10月中放寬畀未補地價居屋、夾屋業主申請後，今年頭兩個月新申請按年都升咗超過六成。
- 阿四：
- 新一份財政預算案提到按揭證券公司會推出年金計劃，都係畀老友記安享晚年，幾時會推出㗎？
- 小森：
- 快㗎嘞，一有消息我哋再同大家分享。
圖片說明：老友記參加安老按揭計劃，可以每個月「有糧出」，都係一種唔錯嘅安老選擇！
安老按揭計劃QR Code
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
