- 阿四：
- 上星期你講到金管局資訊中心有件神秘展品，究竟係乜呢？
- 小森：
- 係一件用香港硬幣砌出維港景色嘅馬賽克作品，名叫「零錢唱」，係由十位香港藝術學院學生花咗好多心思，用咗大約半年時間製作。其中一位同學都喺度，不如一齊同佢傾幾句。
- 阿四：
- 點解幅作品會叫做「零錢唱」？
- 同學：
- 散銀又叫做零錢，「唱散銀」調轉嚟講就係「零錢唱」。呢個名亦表達一個訊息，就係一啲本來不見天日、被放埋一邊嘅硬幣，當聚集埋一齊時就發揮到藝術嘅力量，「唱」出維港嘅新讚歌。
- 阿四：
- 咁你哋製作「零錢唱」最大困難係乜？
- 同學：
- 搵散銀都幾難㗎，因為幅作品好大，要用超過十萬個「無添加」硬幣嚟砌！為咗要突出到層次感，有些景物嘅厚度有成十五、六層硬幣之多。我哋仲要用齊七種唔同面值的硬幣，分成唔同色階去加強對比效果，當中有啲硬幣係全新、亦有半新舊、同埋非常殘舊，有啲硬幣甚至乎已經氧化咗而變埋色。我哋經常要「唱」一大堆硬幣返嚟，仲要喺茫茫「錢」海中將硬幣分類，真係少一分毅力都唔得。
- 小森：
- 你哋去邊度搵一大堆硬幣？
- 同學：
- 硬幣來自金管局嘅收銀車、銀行、商舖、小巴等等，有同學仲用埋家人珍藏嘅硬幣㖭。由於我哋唔可以人工上色，硬幣顏色唔啱嘅話又要再「唱」過，所以我哋搵嘅硬幣遠遠多過最後用到嘅數量。
- 阿四：
- 咁你哋咪成日袋住硬幣周街行？
- 同學：
- 係呀！因為實在太重嘞，所以要用喼幫手，拖住咁多錢行街，都有啲擔心安全㗎，每次都要搵幾個人一齊幫手先得。
- 阿四：
- 「零錢唱」咁大塊，一定好重嘞！
- 同學：
- 重二千幾磅㗎！我哋係要分開九塊去製作，完成後逐件搬嚟資訊中心先合成一塊，安裝個陣要特別小心，亦要再仔細補返接駁位。
- 阿四：
- 聽你哋咁講，製作「零錢唱」真係毫不簡單！真係好想快啲見到件展品呀！
- 小森：
- 資訊中心2月24號重開啦！到時約埋去影相「打卡」。而家只要將影到「零錢唱」嘅相，或者同「零錢唱」一齊影嘅自拍照，上載到任何社交網站，並加入指定的hashtag，然後畀資訊中心服務台職員睇，就會有份紀念品。
- 阿四：
- 咁等我「打卡」share畀朋友睇先！
金管局資訊中心QR code
想問多啲有關金管局工作嘅題目，歡迎電郵到小森、阿四專用郵箱：88hkma@hkma.gov.hk
圖片說明：香港藝術學院學生為「零錢唱」作最後衝刺
