金融科技新成员──Regtech

小森阿四專欄

2018年10月05日

金融科技新成员──Regtech

阿四:
呢几年Fintech(金融科技)听得多,而家发展到有Regtech同Suptech㖭喎。

 

小森:
无错,Regtech英文全写regulatory technology,Suptech就系supervisory technology。

 

阿四:
有乜分别呀?

 

小森:
大致嚟讲,Regtech嘅用家系金融机构,而Suptech用家系监管机构,都系透过利用科技去提升监管同合规嘅效益,通常统称做Regtech。综合市场分析,全球Regtech公司有超过200间,而2017年Regtech总投资额达10亿美元,可以见到市场需求同发展潜力相当大。

 

阿四:
Regtech可以点提升监管同合规嘅效益?

 

小森:
自从全球金融危机后,为咗加强监管,减低再次发生危机嘅风险,加上金融业嘅快速发展,监管银行嘅指引无可避免愈嚟愈多同复杂,而且要不时因应新发展而更新,银行需要投入大量人力资源去跟进同处理,于是引入新科技成为大势所趋。例如业界研究引入「机器可读」(machine-readable)技术,希望能够协助银行「解读」经修改嘅监管要求,然后自行寻找、修改银行内部合规程序当中嘅相关部分,以缩短银行更新内部合规指引同程序嘅时间,提升合规工作嘅效率。「机器可读」应用喺合规工作系相对新嘅概念,各地业界同监管机构仍然喺探索阶段。

 

阿四:
金管局点样促进香港发展Regtech?

 

小森:
旧年我哋推出咗「智慧银行新纪元」,主要系推进金融科技应用到银行产品同服务,今年就轮到Regtech啦!金管局会开放沙盒畀银行同科技公司测试佢哋Regtech项目或概念。另外,金管局仲会研究点样将Regtech应用喺(一)打击洗钱及恐怖分子资金筹集、(二)审慎风险管理同合规、(三)「机器可读」监管要求。而金管局亦会睇下点样利用Suptech提升监管效率和成效㖭!

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年10月05日