金融科技新成員──Regtech

小森阿四專欄

2018年10月05日

金融科技新成員──Regtech

阿四:
呢幾年Fintech(金融科技)聽得多,而家發展到有Regtech同Suptech㖭喎。

 

小森:
無錯,Regtech英文全寫regulatory technology,Suptech就係supervisory technology。

 

阿四:
有乜分別呀?

 

小森:
大致嚟講,Regtech嘅用家係金融機構,而Suptech用家係監管機構,都係透過利用科技去提升監管同合規嘅效益,通常統稱做Regtech。綜合市場分析,全球Regtech公司有超過200間,而2017年Regtech總投資額達10億美元,可以見到市場需求同發展潛力相當大。

 

阿四:
Regtech可以點提升監管同合規嘅效益?

 

小森:
自從全球金融危機後,為咗加強監管,減低再次發生危機嘅風險,加上金融業嘅快速發展,監管銀行嘅指引無可避免愈嚟愈多同複雜,而且要不時因應新發展而更新,銀行需要投入大量人力資源去跟進同處理,於是引入新科技成為大勢所趨。例如業界研究引入「機器可讀」(machine-readable)技術,希望能夠協助銀行「解讀」經修改嘅監管要求,然後自行尋找、修改銀行內部合規程序當中嘅相關部分,以縮短銀行更新內部合規指引同程序嘅時間,提升合規工作嘅效率。「機器可讀」應用喺合規工作係相對新嘅概念,各地業界同監管機構仍然喺探索階段。

 

阿四:
金管局點樣促進香港發展Regtech?

 

小森:
舊年我哋推出咗「智慧銀行新紀元」,主要係推進金融科技應用到銀行產品同服務,今年就輪到Regtech啦!金管局會開放沙盒畀銀行同科技公司測試佢哋Regtech項目或概念。另外,金管局仲會研究點樣將Regtech應用喺(一)打擊洗錢及恐怖分子資金籌集、(二)審慎風險管理同合規、(三)「機器可讀」監管要求。而金管局亦會睇下點樣利用Suptech提升監管效率和成效㖭!

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年10月05日