一啲都唔虚嘅虚拟银行

小森阿四專欄

2018年07月06日

一啲都唔虚嘅虚拟银行

阿四:
听讲有唔少金融同科技公司都想喺香港开虚拟银行,其实同传统银行有乜分别?

 

小森:
虚拟银行主要系透过手机同电脑提供零售银行服务,无实体分行㗎。

 

阿四:
又几有趣喎,但虚拟银行无实体分行嘅话,客户点开户口呀?

 

小森:
有好多方法㗎!好似而家有银行提供「遥距开户」服务咁,申请人用手机扫瞄身份证、影张自拍照,再递交个人资料,咁就大致完成申请开户手续,唔使再落分行。

 

阿四:
我最怕去银行排队,如果可以用手机同电脑处理所有银行服务就最好啦。话时话,虽然我好拥抱新科技嘅,但将自己血汗钱存入虚拟银行,谂落有啲虚。万一有事起嚟,想上门搵个人都无。

 

小森:
唔使担心,金管局有规定虚拟银行要喺香港开设主要办公室,唔会无晒影㗎。虚拟银行申请牌照时要向金管局提交详尽嘅业务计划,而且要证明有充足财政实力,仲要接受金管局嘅监管。另外,虚拟银行同传统银行一样会参加存款保障计划,存款有最高50万保障!

 

阿四:
我又听讲虚拟银行可以促进普及金融,点解嘅?

 

小森:
普及金融嘅意思系市民大众,不论收入高低、财富多寡都可以获得基本嘅银行服务。虚拟银行唔可以设立最低户口结余要求,或者征收低户口结余收费,令小额存户可以有多个选择。

 

阿四:
几时有虚拟银行出现?

 

小森:
预计今年底或明年初发出牌照后,虚拟银行就可以准备推出市面,一有消息再通知大家啦。

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年07月06日