- 阿四：
- 我见到金管局网页新出现一个「25」标志喎！上星期出嘅金管局年报仲用咗「25」设计字样做封面。
- 小森：
- 你有冇留意到，标志当中嘅2同5系仿照两蚊同五蚊硬币字样而设计。用色方面，除咗有金管局标志原有嘅紫色同灰色，仲增添咗银色代表银禧纪念。
- 阿四：
- 唔经唔觉今年系金管局成立二十五周年，点庆祝先？
- 小森：
- 庆祝活动系工作如常，继续为香港银行同金融体系稳定打拼！
- 阿四：
- 咁官腔㗎。
- 小森：
- 我系实话实说。如果要庆祝嘅话，今年有好多事情纪念，好似联系汇率实施三十五周年、外汇基金「入市」对抗「大鳄」二十周年等。
- 阿四：
- 睇返金管局成立以来，香港银行业发展蓬勃，银行资产总额由一九九三年约六万亿港元，升至二○一七年廿二万七千亿港元，升幅近三倍咁多。
- 小森：
- 本港银行嘅客户存款亦由一九九三年嘅一万七千亿港元，大升六倍至十二万七千几亿港元。你都知道金管局主要职责之一，系睇住市民嘅银行存款得到充分保障，除咗透过加强银行管理风险，外汇基金亦向存款保障计划提供备用信贷，万一有银行倒闭嘅话，可以用呢笔钱尽快向存款人发放补偿，为银行稳定提供强大后盾。
香港银行资产增长迅速
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
