练功要小心

小森阿四專欄

2018年03月09日

练功要小心

 

阿四:
小森,我喺网上见到国内有啲用真钞式样嚟做嘅「练功券」,话系畀银行职员用嚟练习数银纸,港纸、美金、日圆、欧罗都有!睇落几过瘾,我都想买嚟「练下功」。

 

小森:
哗,你咪贪一时过瘾,以身试法呀。呢啲模仿真钞式样嘅「练功券」系未经金管局批准印制㗎。总之,唔理你系喺网上购买、由其他地方携带入境、朋友转赠,抑或喺执返嚟,使用或管有呢啲钞票复制品,都有可能触犯香港法例。

 

阿四:
有冇咁严重?上面印住「练功券」咁大只字,无手感、无任何防伪特征,应该一睇就知系假啦,点会扮到真钞用嚟呃人呀?

 

小森:
骗徒手法层出不穷,佢哋会将伪钞混入一叠真银纸入面,鱼目混珠去呃人。又或者夜晚搭的士个阵,趁司机警觉较低时用嚟畀车费。总之,市民尤其系老友记同埋需要处理钞票嘅朋友,收钱个阵,要打醒精神睇真啲、摸真啲!

 

阿四:
我知道金管局不时有举办讲座,教育公众点样分辨真钞。

 

小森:
等我同你重温一下「辨钞四式」啦!第一式:睇睇钞票右上角嘅图案有无变色同滚动光纹;第二式:照照钞票有无内藏完整一条过嘅金属线;第三式:摸摸有无凹凸手感;最后一式系留意钞票有无水印。想知多啲,就去以下网页http://www.hkma.gov.hk/chi/classroom/page/notescoins/security.htm

图片说明:使用或管有「练功券」,分分钟犯法㗎!(网上图片)
图片说明:使用或管有「练功券」,分分钟犯法㗎!(网上图片)

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年03月09日