- 阿四：
- 有位uncle同我讲，话佢间公司最近去银行借钱时，银行要求佢同意将公司嘅信贷纪录提交去商业信贷资料库。佢问点解银行过去都无咁嘅要求，而家叫佢加入信贷资料库？
- 小森：
- 商业信贷资料库唔系新事物，早喺二○○四年推出，涵盖年度营业额五千万元或以下非上市有限公司嘅信贷资料。由今日（十二月一日）开始，商业信贷资料库涵盖范围扩阔到年度营业额一亿元或以下非上市有限公司，令资料库更切合市场所需。
- 阿四：
- 不过我uncle担心同意提交信贷纪录后，公司嘅资料畀人睇晒。
- 小森：
- 唔使惊，只有喺信贷审批、检讨或续期、或者因为间公司出现拖欠嘅情况，银行先可以向商业信贷资料库查阅间公司嘅资料，唔可以为咗做市场推广而查㗎！另外，商业信贷资料库收录公司嘅商业登记证号码、不同信贷类别嘅总授信额、有冇为信贷做抵押，同埋欠款纪录等，唔会收录公司资产总值、股东个人资产等资料。
- 阿四：
- 我知道信贷资料库帮到银行了解借贷人纪录，从而加强管理信贷风险，但对贷款人又有乜好处？
- 小森：
- 准时清还贷款，建立良好信贷纪录系非常重要。银行见到企业信贷纪录「靓仔」，借钱时都大啲机会贷款条件好啲、批核快啲啦！
- 阿四：
- 商业信贷资料库嘅纪录保存几耐？
- 小森：
- 一般嚟讲，有限公司嘅每项信贷资料，会由该项信贷完全清还个日计起储五年。资料库会将过时嘅资料由系统删走㗎。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
