- 小森：
- 上星期我哋讲开回归之后，港纸发行有增无减，其实呢廿年嚟，香港银行嘅发展同样稳中向好。
- 阿四：
- 我知！去年银行资产总值接近廿一万亿元，差唔多系九七年嘅二点五倍。
- 小森：
- 如果你将银行总资产值同香港GDP比较，仲可以睇到更多。你睇下幅图：九七年时银行资产值大约相等于GDP六倍，去年已经升到超过八倍。香港作为亚洲区嘅银行中心，有唔少跨国银行以香港作为亚太区总部，银行业唔单止服务本地经济活动，更为区内客户做资金融通，去年大约有三成港银贷款喺香港以外使用。
- 阿四：
- 呢个资产对GDP比例系咪愈大愈好呢？
- 小森：
- 当然唔可以只系睇数字。冰岛同爱尔兰嘅银行总资产亦曾经增长到GDP嘅九倍，但因为无做好风险管理，喺○八年遇上环球金融危机，○九年出现银行危机，银行体系资产狂跌！香港经历过九七亚洲金融危机，汲取教训同经验，着力进行多项巩固货币同金融体系嘅改革，所以港银喺○八年能够抵挡全球金融危机带嚟嘅巨大冲击。特区政府亦果断、适时推出一千亿嘅中小企融资担保计划，及时保住一大批中小企同几十万打工仔饭碗。港银多年得以稳定发展唔系因为好彩，只系平日做足准备功夫。
- 阿四：
- 唔怪得陈总不时提金管局同事：「金融稳定」系「重中之重」。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
