你「转数快」咗未?

小森阿四專欄

2018年09月21日

你「转数快」咗未?

小森:
上星期我哋提过嘅快速支付系统,终于宣布推出啦,仲改咗名叫「转数快」。以后市民可以用收款人嘅手机号码或电邮地址,即时畀钱人!

 

阿四:
我可以喺边度下载呢个app?

 

小森:
无app㗎!「转数快」系金管局提供畀银行同手机钱包营运商嘅转帐平台,呢31家机构嘅用户以后经「转数快」收钱,只要喺网上银行、手机银行或电子钱包登记,将手机号码绑定收款帐户,就系咁简单。

 

阿四:
但系我有几个户口同手机钱包,手机号码只得一个,我点知啲钱会转去边个户口㗎?

 

小森:
一个手机号码可以登记多个户口同电子钱包,但你要拣其中一个做预设收款帐户。当有人转钱畀你,只需输入你嘅手机号码,啲钱就即时转入你嘅预设收款帐户。

 

阿四:
假如我同朋友食完饭夹钱,想用预设收款帐户以外嘅其他已登记帐户收钱,点做呀?

 

小森:
你叫朋友输入你嘅手机号码后,再输入埋你银行或电子钱包名称,咁就搞掂。

 

阿四:
用「转数快」收钱要登记,咁畀钱又使唔使登记?

 

小森:
唔使。你用返平日用开嘅网上银行、手机银行或手机钱包转帐就得。「转数快」启用后,你转帐时可以选择输入收款人嘅手机号码,再输入转帐银码,核对返资料正确,咁就转到数。

 

阿四:
「转数快」喺9月30日开始正式启用,想享受年中无休、无银行/手机钱包限制、小额过数无收费嘅即时个人对个人(P2P)转帐服务,就快啲登记!

转数快网页:https://fps.hkicl.com.hk/schi/fps/index.php

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年09月21日