银行户口咪借人

小森阿四專欄

2018年06月01日

银行户口咪借人

阿四:
我有位亲戚用个人银行户口处理生意往来嘅资金,最近户口被银行取消咗。因乜解究? 

小森:
近年国际社会大力打击洗钱等呢啲不法行为,银行亦因而加强监控呢类嘅活动。个人户口本身唔系畀人用嚟做生意㗎嘛,所以银行一发现户口有异常资金进出,怀疑同洗钱有关,就会冻结甚至取消户口。

阿四:
呢位亲戚想借我银行户口用住先,唔系用嚟做生意,咁又得唔得?

小森:
无论任何情况,银行户口都唔能够借畀其他人用。你去银行开户口时,银行核对过你嘅身份证明,了解过你嘅户口用途,先至开户口畀你。户口借咗畀人用,就同你之前向银行申报嘅用途有出入,万一涉及不法活动,分分钟会变成「洗黑钱」。 

阿四:
查实咩系「洗黑钱」呢?

小森:
所谓「洗黑钱」,就系不法份子将喺贩毒、贪污、避税、诈骗等等呢啲非法活动收取嘅「黑钱」,透过各种手段,例如借用良民嘅户口,以掩饰呢啲钱嘅来源。「处理犯罪得益」罪,即系洗黑钱,最高刑罪系罚款500万港元同埋监禁14年。

阿四:
原来借户口畀人用可以咁大件事㗎,但我乜都唔知情,都系犯法?

小森:
如果你户口借出去涉及不法活动,就好大机会当你有份参与㗎嘞。新闻都经常有呢类报道,有啲人出于好心抑或贪心而借出户口被人洗钱,上到法庭个阵用「唔知情」求情,最后都会被判罪。 

阿四:
听完你讲,我仲点敢借户口畀人!香港系国际金融中心,资金自由流动,所以金管局一直好紧张反洗钱同恐怖分子资金筹集嘅工作,同银行、执法机构紧密合作,做好把关工作,并采取国际标准嘅监管模式,阻止黑金「漂白」,保障香港银行体系嘅健全同声誉,令市民和正当企业获得安全可靠嘅银行服务。


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2018年06月01日