- 小森：
- 上一篇讲到金管局可以同银行无上限同自由咁以固定汇率兑换美元/港元，点解可以咁有把握？
- 阿四：
- 好简单，因为每当有资金流入香港时，金管局就会将收到嘅美金，放入外汇基金嘅「支持组合」去管理，绝对唔会洗咗佢㗎。
- 小森：
- 原来「支持组合」就系「支持」港元稳定，咁呢个组合持有乜资产㗎？
- 阿四：
- 都系一啲高流动性同信贷质素良好嘅美元资产，例如美国国库券。万一市场上对港元需求转弱，减持港元兑换美金时，外汇基金可以随时将呢啲美元资产变返现金，应付市场兑换美金嘅需求。
- 小森：
- 我记得，上次你话金管局好似一间年中无休嘅超级兑换店，随时有人拍门换钱，都要即刻以固定汇价兑换。我都想去金管局换啲美金喎！
- 阿四：
- 只系换畀银行㗎咋。你要换就去返银行啦。
- 小森：
- 其实行联系汇率对香港有乜好处？
- 阿四：
- 香港系一个细小而极度开放嘅经济体，好易受外围因素影响，就好似未实施联汇制度前，港纸大幅贬值，直接影响民生同埋金融系统嘅稳定。而且，现时环球贸易同金融交易主要系用美元定价同结算，而香港股票等金融资产虽然系用港元计价，但因为同美元挂鈎，减少咗投资者嘅外汇兑换同风险管理成本。呢个系香港金融市场持续发展嘅重要因素，亦有助巩固香港作为国际商贸同金融中心嘅地位。国际货币基金组织多年嚟都支持联汇制度，认为有关制度仍然最适合香港，同埋系维持香港稳定嘅基石。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
