- 阿四：
- 我啱啱撞到Brian同Nelson，话赶住去chatroom（聊天室）。乜金管局有间咁嘅吹水房？
- 小森：
- 你就吹水！佢哋讲紧专为银行同科技公司而设嘅金融科技监管聊天室。呢个系金融科技监管沙盒2.0嘅新增功能，投入运作唔够一星期，已经有银行同科技公司分别嚟同我哋同事见咗面攞监管意见。
- 阿四：
- 又几快手喎。其实金管局已经有沙盒畀金融科技产品喺小范围做测试，点解仲增设聊天室？
- 小森：
- 一般嚟讲，金融科技产品去到较成熟阶段，先会喺沙盒进行测试。至于一啲仍然处于构思或研发初期阶段嘅创新项目，就可以透过聊天室同我哋倾倾，初步了解有乜监管议题需要注意。万一有唔妥，可以及早调整修改，甚至谂其他方案，咁就行少啲冤枉路啦。金管局亦会因应项目嘅业务性质，例如有冇涉及网上理财、有冇提供网上贷款等，再安排相关部门同事提供意见。有去过聊天室嘅银行表示，呢啲意见对银行准备测试，同埋之后推出嘅金融科技项目好有用，例如帮助提升客户体验，令项目推出时既能满足到相关嘅监管要求，又更能迎合到客户嘅需要。
- 阿四：
- 唔怪得负责监管银行科技风险嘅Brian、同埋金融科技总监Nelson嘅同事都有份去管理聊天室啦。边啲公司可以用呢个聊天室？
- 小森：
- 任何银行同科技公司，尤其提供同银行服务有关嘅金融科技产品，都可以申请使用。
- 阿四：
- 如果系银行服务再加其他金融服务，例如证券、保险等嘅跨界别产品，又用唔用得呢？
- 小森：
- 一样欢迎嚟搵我哋倾下先，如果有啲范围系金管局畀唔到意见，我哋会转介企业到证监会或保监局嘅沙盒。
- 阿四：
- 点样申请使用聊天室？
- 小森：
- 企业可以将查询问题电邮到聊天室专用邮箱：chatroom@hkma.gov.hk，我哋尽可能喺七个工作天内回复。另外，想同我哋视像会议或面谈，就要喺每个月嘅1号同15号开始用电邮预约，会议名额先到先得。记得先填妥表格，等我哋了解项目性质，以便作出合适安排。
- 阿四：
- 想知多啲沙盒2.0同聊天室详情，可扫瞄以下二维码或浏覧http://bit.ly/2Anutlu
金融科技监管聊天室QR code
图片说明：有Fintech问题？搵金管局科技及流动性风险监理处主管李伟文(Brian)（左）同金融科技总监周文正(Nelson)（右）聊聊吧。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
