债券通对香港嘅意义

小森阿四專欄

2017年07月07日

债券通对香港嘅意义

小森:
债券通开通个日场面好墟冚,打锣打鼓,你有冇睇到?

阿四:
我有睇新闻。不过散户又无份参与债券通买卖,好似同我哋啲小市民无乜关系咁。

小森:
点会无关?债券通用香港做连接各地投资者进入内地债券市场嘅枢纽,就好似沪港通、深港通咁,再次显示香港协助内地金融市场开放嘅独特作用。

阿四:
有几独特呀?

小森:
内地债市喺现有制度下,只限个别国际机构投资者直接开户参与。债券通突破之处就系将内地同香港嘅金融基础设施互联互通,畀海外机构投资者沿用国际买卖债券嘅结算托管习惯,而内地债券交易机制又唔使作出重大改变,真正做到一站通。

阿四:
听落好似好简单!

小森:
呢个先系最考功夫嘅地方,睇到香港作为金融中介嘅价值。况且内地债市全球第三大,规模达六十七万亿人民币,而家境外投资者不足2%,你话潜力几大呢!

阿四:
债券通仲可以为香港带嚟乜好处?

小森:
债券通方便咗海外投资者,再加上人民币愈嚟愈国际化,相信日后吸引到更多资金利用香港呢个平台买卖内地债券,对跨境结算、托管、资产管理、风险管理等金融服务需求都会大大增加。呢啲高增值嘅职位都可以为香港经济增长带来实质贡献。

 


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年07月07日