- 阿四：
- 点解美国加息，香港息口无跟住一齐加？
- 小森：
- 你讲紧边种利率？息口只系笼统嘅称呼，细分嘅话有香港银行同业拆息（HIBOR）、存款利率、最优惠利率（Prime rate）等，每种利率走势都由唔同因素带动。
- 阿四：
- 近排楼市咁热，我当然系讲紧按揭利率啦。美国由2015年底开始加息几次，噚日又加多一次，但睇返香港按揭利率无乜跟住加。
- 小森：
- 近年比较多业主拣用嘅「H按」，当中嘅H即系HIBOR，通常系一个月HIBOR利率。H无跟足美息一齐升，按息咪好似无乜点郁罗。
- 阿四：
- 乜唔系当美息高过港息时，就会引发资金流走，最终推高港息？
- 小森：
- 自从2008年环球金融危机后，差唔多有一千三百几亿美金流入咗香港。银行水浸，短息就难升。不过，港美息差唔会无限扩阔嘅，息差越大就会诱发越多资金流走，最终港息都会有压力要调高。
- 阿四：
- 既然资金未大举流走，点解金管局仲要成日提醒大家小心美国利率正常化带嚟嘅风险？
- 小森：
- 因为除咗港美息差会带嚟资金流走压力，其他因素例如环球嘅资金流向、投资者对香港资产嘅兴趣等等，都一样会有影响，所以好难准确预测港息最终会升几多、升几急。准业主做按揭时要谂清楚加息对自己供楼支出嘅影响，唔好低估加息嘅威力。举例要供二十五年楼，每加一厘息嘅话，每个月供款就多超过一成，咪话唔襟计。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
