- 阿四：
- 小森，早排你介绍我睇下金管局新开嘅「开户难？」专页，内容好实用，例如「银行联络资讯」一栏就列出晒香港二十间零售银行开户嘅联络方法，悭返用家搵资料嘅时间！
- 小森：
- 金管局非常重视香港开户困难嘅情况，仲特别成立咗一个专责小组去处理。佢哋嘅专用邮箱开通以嚟，都不时收到有关开户嘅投诉或提问，小组同事都会逐一审视同跟进。
- 阿四：
- 除咗专页同电邮外，金管局喺开户困难方面仲做咗乜嘢跟进工作？
- 小森：
- 我哋同银行、商会等各持份者就开户问题嘅沟通一直无停过。好似上星期五咁，金管局就同投资推广署合办咗一场交流研讨会，有二十一个商会、二十八间银行嘅过百名代表出席，就开立、维持户口进行直接而深入嘅交流。
- 阿四：
- 沟通真系会有帮助吗？
- 小森：
- 当然有。其实开户困难嘅问题，有时只不过系沟通出现误会。我哋见到有啲银行设立咗开户专线，由受过训练嘅员工负责解答返开户疑问后，客户体验都改善咗。
- 阿四：
- 讲起客户体验，我知道有啲海外公司要飞嚟香港几次先开到户口，佢哋就觉得唔系几方便。
- 小森：
- 完全同意，我哋亦有同银行反映呢个问题。有银行就推出咗「预先审阅」程序，畀申请人可以透过电邮、传真或邮寄有关开户资料，银行初步审阅过之后，先再安排面对面嘅会议，减少海外公司飞嚟香港嘅次数！
- 阿四：
- 听讲金管局同业界倾紧建立一个「认识你的客户」资料库，提升银行尽职审查工作嘅效率。
- 小森：
- 系呀，客户都同样受惠㗎，以后开户唔使再逐间银行递交文件，缩短开户嘅流程。
- 阿四：
- 几时会推出？
- 小森：
- 金管局已同主要银行、技术供应商开过几次会，大家都会就呢方面再多做功夫，有进一步消息就再通知大家。
图片说明：金管局同投资推广署合办交流研讨会，过百名银行同商会代表出席，交流开立同维持户口嘅议题。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
