- 阿四：
- 小森，你好、沙哗啲卡、Namaste！
- 小森：
- 做乜无啦啦讲外语？
- 阿四：
- 乜你唔知金管局网页新增咗一个为居港少数族裔而设嘅资讯专页，分别用七种居港少数族裔嘅常用语文，包括印尼文、印度文、尼泊尔文、泰文、他加禄文、乌尔都文同埋旁遮普文，提供一啲实用嘅银行服务资讯畀佢哋参考。
- 小森：
- 好贴心喎。呢个资讯专页有乜睇㗎？
- 阿四：
- 好实用㗎，例如有开户嘅一般资讯、使用自动柜员机嘅保安提示、存款保障计划，仲有由银行公会提供关于认识不动账户同稳健理财嘅小册子。我哋亦上载咗《公平待客约章》同埋《银行营运守则》嘅一般原则。呢个新设嘅资讯专页能帮助少数族裔人士在使用银行服务时，更清楚了解自己嘅权利同责任。
- 小森：
- 呢个资讯专页可以帮到几多人？
- 阿四：
- 应该帮到唔少㗎，根据政府统计处嘅中期人口报告，二○一六年香港非华人嘅人口大约有五十八万（包括外籍家庭佣工约三十二万人），占居港人口比例约百分之八。呢五十八万非华人之中，印尼、印度、尼泊尔、泰国、菲律宾及巴基斯坦裔合共占超过七成。
- 小森：
- 金管局陈总裁成日讲普及金融，意思就系市民大众可以获得基本嘅银行服务，当然包括埋少数族裔啦。
- 阿四：
- 系㗎，金管局都好关注少数族裔使用银行服务时，系咪获得公平对待。好似几年前曾经向银行发出通告，提醒佢哋要遵守促进平等机会嘅相关条例，喺提供服务时，乜嘢家庭狀况（例如单亲）、性倾向、年龄或种族，都要一视同仁㗎！
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
