- 阿四：
- 小森，旧年你同我讲用新钞封利是唔够环保，我今年听话改用迎新钞。
- 小森：
- 系㗎，三间发钞银行每年农历新年前都额外印新钞，过程中既要用棉花、又要用油墨，仲未计要调配人手确保市民换钞过程顺畅，同埋运送钞票到分行！单系运钞嘅流量，听讲就比平日多两成。其实不论新钞旧钞，封得利是就系好钞。迎新钞占总出钞量比例由2006年20%增加到近年约45%，反映市民都好支持。
- 阿四：
- 讲开又讲，发钞银行会筛选一啲用过但仍然新净嘅银纸嚟做「迎新钞」，咁用到残残旧旧嘅银纸，又会去咗边呢？
- 小森：
- 其实三间发钞银行每日都要同回流返金库嘅银纸做body check（体检）㗎。佢哋会用大型清分机检查自家发行嘅旧钞，仲系咪适合继续流通使用。清分机自动筛出残旧嘅银纸后，就会即时碾碎，然后拎去销毁。清分机一分钟可以处理成千张银纸，一日八个钟头就可以清分到五十万张银纸，真系好有效率㗎！
- 阿四：
- 旧钞有几旧先会被淘汰？
- 小森：
- 一般嚟讲，银纸有崩、有烂、划花咗、防伪特征无咗、霉霉烂烂等，就无得留低㗎嘞。
- 阿四：
- 霉霉烂烂都分得出？
- 小森：
- 清分机透过检查银纸嘅湿度，就知道有几霉。新净银纸干身，用手指弹会有清脆嘅声音；相反，如果张银纸湿气重，弹唔响，就系残钞嚟啦。
- 阿四：
- 唔怪得香港嘅银纸一般都干净企理，背后原来做咗咁多功夫。
图片说明：发钞银行每日都会用清分机帮银纸做body check
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
