- 阿四：
- 我去开嗰间美容院推出套票优惠，买得愈多折扣愈大，仲可以用信用卡分期付款，计落好着数！
- 精明大使：
- 着数还着数，你有冇谂过万一美容院倒闭，你分期付款啲钱会点？
- 阿四：
- 我都冇得做埋剩返嘅疗程，梗系唔使还啦！
- 精明大使：
- 梗唔系啦！用信用卡分期付款其实系你同发卡银行借咗笔钱，先由银行找晒笔数畀美容院，然后你再分期还钱畀银行。所以就算优惠有几吸引，喺签分期付款合约前都要睇清楚啲条款，当中都提醒万一商户执笠，你都有责任继续还款，唔好因为急住签单而睇漏。
- 阿四：
- 如果我用信用卡签账直接一笔过畀钱美容院，系咪佢哋执笠时而我又未用完美容疗程，就可以有信用卡退款保障？
- 精明大使：
- 基本上可以，但要睇下你张卡所属信用卡组织嘅条款，包括退款保障嘅期限。如果好耐之前嘅签帐，就可能申请唔到退款。
- 阿四：
- 原来唔系一定有得退返哂钱！我点样知道我啲签帐有无得申请退款？
- 精明大使：
- 系呀，所以你一笔过畀钱前，最好谂清楚自己系咪退款保障限期内用得晒所有疗程。仲有畀钱后，记得保留返交易记录如收据同商户签订嘅合约，以备申请退款时递交。想知多啲，睇下金管局同埋发卡银行嘅网页，或者直接问下银行啦！
- 阿四：
- 如果我唔系分期付款，又唔系一笔过畀钱，只系同商户签约，每个月用信用卡自动转帐畀钱，佢执笠时又点算？
- 精明大使：
- 商户执笠后应该唔会继续转帐，但最好留意下一期信用卡月结单，如果发现有相关嘅帐项，你可以联络发卡银行帮忙安排尽快退款。
- 阿四：
- 原来用信用卡过数都有咁多学问，今次真系长知识！
- 精明大使：
- 想知多啲使用信用卡贴士，可以浏览金管局网页。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
