唔系玩泥沙嘅金融科技沙盒

小森阿四專欄

2017年03月03日

唔系玩泥沙嘅金融科技沙盒

小森:
上星期财政预算案里面财爷提到好多金管局金融科技(Fintech)嘅发展呀!

阿四:
讲开Fintech,听闻金管局有个乜嘢沙盒?

小森:
「金融科技监管沙盒」呀!去年9月推出,截至今年2月底就有6间银行嘅12项金融科技项目用沙盒进行测试。

阿四:
点解叫做沙盒?

小森:
沙盒英文系Sandbox,意思系畀小朋友玩泥沙嘅地方。金融科技监管沙盒就系畀银行推出方便用户嘅金融科技产品前,先喺小范围做测试,试啱先正式推出市面。

阿四:
究竟系银行要搬个沙盒返去用,抑或要嚟金管局用沙盒呢?

小森:
沙盒唔系真系一个盒,亦无泥沙玩!而系一种监管理念,容许银行唔需要完全符合监管要求,就可以测试新产品。举个例子,旧年有间银行计划推出指纹认证技术,用嚟登入手机银行,佢哋用咗沙盒,先畀过百个员工真实试用一段日子,收集用户意见,无问题先正式推出畀客户。

阿四:
咁有乜好处呢?

小森:
你都知新科技嘅嘢,真系要多啲人试用先知有冇问题。沙盒嘅目的就系向银行提供一个风险可控嘅范围,等佢哋唔需要符合所有监管规定情况下,试下产品嘅运作,咁样可以加快推出产品嘅时间。以生物认证为例,银行认为可以缩短2至3个月时间㗎。

阿四:
头先你话有12项金融科技项目有用沙盒测试,包括咗啲乜呢?

小森:
有「生物认证技术」,包括有声音、指纹同手指静脉嘅认证,部分已经推出市场,唔使用户登入名称、唔使密码、唔使签名,就可以用到银行服务。仲有区块链(Blockchain)、应用程序接口(Application Programming Interfaces)、聊天机械人(Chatbot)、软体认证令牌(Soft Tokens)。

阿四:
除咗生物认证外,其他我都唔系好明你讲乜!

小森:
呢啲都系会重大改变金融业运作嘅技术!我下次有时间解你知。

阿四:
其实系咪任何初创企业都可以用金融科技沙盒㗎?

小森:
阿四,我考下你,金管局系监管啲乜?

阿四:
金管局监管香港嘅银行业务同接受存款公司嘛!咁浅都要问,你唔好当我系Lulu。

小森:
无错嘞。金管局负责监管银行,所以佢哋嘅沙盒只系适用于银行。不过有初创企业都伙拍银行研发金融科技项目,仲一齐用沙盒㖭。

阿四:
希望银行推出多啲新科技产品,等我哋啲市民都可以得益。

金管局金融监管科技沙盒里面嘅项目包罗万有

图片说明: 金管局金融监管科技沙盒里面嘅项目包罗万有

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年03月03日