- 小森：
- 你早几日问我借相机，有乜好嘢影呀？
- 阿四：
- 我同陈总裁、金管局金融科技促进办公室同事喺星期二（六月五日）去咗深圳，同深圳市副市长艾学峰、深圳金融办主任何晓军，以及「深港金融科技创新奖」比赛嘅得奖机构代表聚首一堂，当然要影低呢个重要时刻啦。
- 小森：
- 不单只见面一刻重要，呢个比赛实在意义重大，系金管局第一次同金融办联手搞金融科技（fintech）比赛。金管局同深圳金融办希望藉住呢个比赛，可以进一步加强港深两地喺fintech嘅交流同合作，推出更多优质嘅跨境金融产品同服务畀用户，帮助推动粤港澳大湾区嘅融合，方便市民生活同营商活动。
- 阿四：
- 无错，所以今届赛事特登加入「金融创新奖（深港组）」，专畀港深跨境金融产品同服务项目参加嘅，今次六个得奖项目分别由港深企业平分秋色。比赛另设有「金融科技专项奖」，用嚟表扬区块链、人工智能、大数据等嘅项目，香港企业都有份获奖㗎，证明我哋喺金融科技嘅实力唔弱㗎。
- 小森：
- 相你就影完嘞，几时还返相机畀我？
- 阿四：
- 未得住，因为港深两地好快又有交流活动嘞！金管局举办嘅「金融科技人才培育计划2.0」将喺6月推出「深圳暑期实习计划」，到时会有大约50名香港高等院校学生，分别去深圳8家知名金融科技或科技金融公司实习6星期，我影埋先畀返相机你啦。
图片说明：金管局总裁陈德霖（前左二）聚精会神听取「深港金融科技新奖」得奖机构介绍其fintech产品
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
