「中小企融资担保计划」李老总。黄老板。何经理 ~ 真诚对话

何经理：

黄老板，乜咁啱撞到你，返中山过周末，打Golf？

黄老板：

系呀！旧年成年个市都立立乱，要睇实啲生意，系到依家先至话得闲啲，可以歇一歇。

何经理：

旧年啲生意点样，有冇融资方面嘅嘢我哋银行可以帮到手？

黄老板：

多谢晒先，不过暂时唔使住，你哋银行畀我条line仍然够用。旧年外围经济环境波动得紧要，初时爆出英国脱欧，之后走只黑天鹅特朗普出嚟，汇市更系风高浪急。我哋做转口生意真系要打醒十二分精神，唔好话扩张，可以守好档生意，已经算系唔错㗎嘞。讲开又讲，乜唔系话银行对中小企闩水喉咩？

何经理：

我哋银行对中小企放款无话特别手紧咗喎！同啲行家讲起亦唔觉呢个系普遍嘅情况。但正如你所讲，外围经济环境波动，我哋都会格外留神，多啲关注一下客户嘅风险。

黄老板：

有乜贴士可以帮中小企攞到line？盘数唔靓或者新公司会唔会好难借到？

何经理：

其实最紧要都系做好基本功，提供齐全嘅财务同埋业务资料对申请最有帮助。我哋同客户系长期嘅关系，唔会因客户嘅财务状况一时受经济周期影响而落雨收遮。另外，可以考虑政府提供嘅融资协助计划，有冇听讲过中小企融资担保计划，即系SFGS？

黄老板：

有呀! 上次按揭证券公司派代表上我哋商会介绍过，仲收过佢哋经商会发放嘅消息。听落好似好笋，唔使抵押品、最多借千二万、计埋保费每年利息都系五厘几。但系我听啲中小企老板讲有啲银行好似唔系好积极推介。无理由，政府担保咗八成风险！

何经理：

我都听闻过有啲行家担心无得赔，咪唔鼓励啲客申请罗。不过前排按揭证券公司走访咗各大银行，解释咗佢哋嘅理赔原则同程序。我问过我银行催收部门嘅同事，佢哋了解多咗后更容易配合按揭证券公司嘅理赔工作，索偿嘅过程都顺畅咗。我留意到有行家明显积极咗接触中小企客户同推介计划。

黄老板：

会唔会好难申请，门槛会唔会好高？

何经理：

唔会，营运超过一年同还款记录良好就合资格。申请要嘅都系一般公司注册同股东资料。我哋帮客递咗form后几日就有回覆。

(呢个时间何经理留意到李老总原来坐在后排)

何经理：

李总，啱晒嘞，你喺度，我同呢位黄老板正讲起贵宝号嘅SFGS。不如由你直接介绍一下最新情况。黄老板，呢位系按揭证券公司嘅CEO，李总。

李老总：

何经理，首先多谢你帮我公司推介SFGS畀黄老板。其实你好多行家最近都落力咗推SFGS。以往第三、四季一般都比较淡静，但我哋睇到SFGS嘅申请数字自旧年第三季起有回升迹象。个别比较积极嘅银行更有明显嘅升幅。我哋希望个增长势头今年可以保持。当然，大家都了解申请数字嘅变化好受到个经济大环境所影响。

黄老板：

李总，你哋咁落力推SFGS，一定赚唔少？

李老总：

啱啱相反，啲保费我公司一毫子都冇落袋。其实个计划收到嘅保费全部属于政府，用嚟赔偿坏账畀银行，我哋只系协助政府营运个计划，主要系想帮到多啲中小企。

黄老板：

按揭证券公司仲有乜板斧再帮下我哋啲中小企先？ 保费可唔可以再减啲？ 保额可唔可以再加啲 ？

李老总：

由于政府先至系金主，保费同保额我哋就话唔到事嘞。但计我话依家个保费已经好平，只系正常嘅两、三折。以一百万贷款额同六厘息嚟计，一个月保费先至几旧水，饮餐茶嘅价钱。喺我公司嚟讲，最紧要系确保计划运作畅顺，畀到大家信心个计划有得赔同赔得快，银行先至会更安心同更积极去利用个计划支持中小企。正如何经理头先讲，呢几个月我哋见咗唔少银行，解释咗我哋嘅理赔程序同原则，消除咗唔少误解。由于银行之后能够更加积极配合我哋嘅理赔工作，过往几个月完成嘅赔偿case亦大幅增加。另外，我哋亦会因应收集到嘅意见进一步优化理赔嘅程序。

何经理：

李总，我哋银行一定会继续积极配合同支持呢个计划。

李老总：

个计划仲有大把水位，可以借多差唔多八百亿元，我哋好希望大家可以踊跃使用！

黄老板：

睇嚟个计划真系帮到手喎！等我见到其他中小企老板时大力推一推，畀多几个Like！

李老总：

多谢多谢！

中小企融资担保计划主要发展及参考数据：

• 按揭证券公司去年积极向业界及银行推介中小企融资担保计划，包括与业界代表及银行管理层会面，及向银行员工讲解计划运作
• 根据过往经验，计划的申请数字通常自年中会开始有所回落，但2016年第三及第四季的申请数字非但没有下跌反而有所上升，个别加强了中小企业务的银行更录得显著增长
• 在银行积极配合下，按揭证券公司2016年全年完成的索偿个案达94宗，比2015年的62宗增加了52%，其中73宗于2016年第三及第四季完成
• 按揭证券公司早前进一步优化计划处理索偿的程序，包括减省索偿须提交的资料及让银行预先上载文件以提升索偿效率，亦更早让银行知悉索偿是否获批

香港按揭证券有限公司
2017年1月23日