- 阿四：
- 小森，你上次同我講嘅按揭證券公司年金計劃，估唔到咁快就有公布！
- 小森：
- 係呀，按揭證券公司嘅同事一直有就安老產品花心思去做研究，佢哋參考咗香港同海外市場現時年金產品嘅條款，準備過程中亦不停同持份者取經、摸底、聽意見。
- 阿四：
- 最重要係呢個計劃簡單易明，特點係終身保證、即時提取，填補咗而家市場嘅空隙。每個人投保上限係100萬蚊，以每年內部回報4厘、65歲開始投保，估計男投保人每個月收5,800蚊，女投保人就收5,300蚊嘛。咁簡單，我都識得同爸爸媽媽介紹返。
- 小森：
- 簡單嘅數字背後做咗好多功夫㗎。年金嘅計算方法比較複雜，而且涉及年期非常長，又有好多唔同嘅假設，按揭證券公司嘅精算師需要針對唔同假設嘅眾多可能性進行模擬分析，務求計到一個老友記覺得吸引嘅回報水平，而按揭證券公司又有持續充足嘅財力去執行。話晒按揭證券公司都係由公帑注資成立，所以都要好審慎管理風險。模擬分析都好花時間，修改一個數都要重新計過全盤數目，往往用幾個鐘頭，甚至成晚開住部電腦計。
- 阿四：
- 除咗有精算師負責計算年金回報，金管局同按揭證券公司亦有唔少同事參與產品設計。佢哋雖然對年金嘅認識比唔上精算師，但就可以從投保人嘅角度考慮產品嘅細則，聽聞有同事表現得好投入，當正自己係退休人士咁去諗，保證年金產品夠「貼地」。
- 小森：
- 咁又係，呢個係面向公眾嘅投資產品，諗嘅時候除咗計數，仲要多啲切身處地從用家心理去度蹺，盡量人性化都非常重要。而畢竟今次係金管局同按揭證券公司第一次推出年金產品，就算係擁有豐富財金經驗嘅同事，都要補補課。而家聽佢哋講年金，都幾有專家feel㗎。
- 阿四：
- 我知道按揭證券公司好嚴謹，下一步會搵獨立專業人士睇睇年金產品係咪持續可行，先至會推出市場。
- 小森：
- 係喎，上次你講到同世伯伯母建議參加安老按揭計劃。如果佢哋同時參加安老按揭計劃，以平均每個月攞15,000蚊計，再加埋年金計劃嘅話，每個月就有一筆唔錯嘅固定收入。
- 阿四：
- 不過我都會提醒返佢哋，無論逆按揭、年金，或者市面上其他安老產品都各有優點，最重要係清楚了解自己需要同產品特質，精明配置資金呀！
- 小森：
- 我一直都好羨慕我啲退休公務員世伯有長俸收，第時我都可以用年金計劃自製長俸，唔使咁「葡萄」！
- 阿四：
- 我有個好孝順嘅朋友仲話送份年金畀家中長輩㖭呀！到底年金產品幾時開始發售？
- 小森：
- 按揭證券公司正着手研究計劃嘅細則，預計最快下年年中推出。睇到市民初步對產品嘅反應唔錯，令我哋更有動力做到最好。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
