跨境金融科技大踏步

小森阿四專欄

2017年10月27日

跨境金融科技大踏步

阿四:
陳總,金管局呢排好「Fintech」喎。上個月你先宣布香港進入智慧銀行新紀元,早兩日又喺金融科技日話同新加坡、粵港澳大灣區加強跨境合作發展金融科技。

陳德霖:
智慧銀行新紀元唔係講咗算數,要用實際行動找數!跨境合作係提升香港金融科技嘅重要環節,唔能夠掉以輕心。

阿四:
我知道,金管局夥拍7間銀行推出貿易融資平台,遲啲仲會接通新加坡貿易平台,其實有乜用?

陳德霖:
貿易融資一直難以數碼化,原因係每宗貿易嘅參與者通常來自唔同地區、往來文件繁瑣。而且融資過程大多數係人手處理,有造假風險,所以銀行審批貿易融資都特別審慎。金融科技就帶嚟重大突破,香港嘅貿易融資平台會採用分布式分類帳技術(distributed ledger technology,DLT),將貿易融資流程自動化同數碼化,減省用紙。DLT同時有不容許改動文件內容嘅特點,所以能夠降低詐騙風險。日後我哋同新加坡嘅貿易平台接通咗,有助促進跨境貿易同資金融通。

阿四:
呢個跨境平台咁幫得手,銀行以後就可以放心做多貿易融資。但有一點我唔明:香港同新加坡唔係競爭關係咩?

陳德霖:
阿四,要維持國際金融中心地位要望遠啲,呢個跨境貿易融資平台可能係全世界第一個應用DLT解決跨境融資數碼化同自動化問題嘅方案,同新加坡合作成功後,可以擴展同其他貿易夥伴合作。呢個係一項重要金融基建設施,對香港將來嘅貿易融資發展有戰略性意義。

阿四:
咁粵港澳大灣區又有咩重點項目?

陳德霖:
大灣區喺金融同科技方面有好大「強強聯合」嘅空間,肯定係中國發展現代金融服務業同Fintech嘅橋頭堡。金管局將會同深圳當局推出多項合作項目,例如金融科技創新大賽、互相轉介金融科技公司落戶,仲籌備緊香港大學生明年去深圳龍頭科技公司做暑期實習。

阿四:
嘩,咁多工作同時進行,睇嚟香港呢個新紀元好快就到!

陳總裁喺金融科技日宣布加強同新加坡、粵港澳大灣區喺Fintech嘅合作。
圖片說明:陳總裁喺金融科技日宣布加強同新加坡、粵港澳大灣區喺Fintech嘅合作。


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年10月27日