- 阿四：
- 听同事讲，话金管局积极推动企业嚟香港开设CTC，系乜东东嚟㗎？
- 小森：
- CTC系企业财资中心（corporate treasury centre）嘅英文缩写，好多跨国公司都设有内部CTC，集中管理全球各地分支同关联公司嘅资金、融资、外汇兑换、投资同对冲等财资活动，用嚟提升公司整体财务、运作效益同管理风险。
- 阿四：
- 咁咪好似我哋将钱畀妈妈做「家用」，由佢集中管理全家嘅生活开支点样使，例如几时去超市入货、几时去「唱」外币旅行用，等「家用」见使啲？
- 小森：
- CTC嘅工作唔止「格价」悭钱，仲发挥资金池嘅作用，睇住集团内各公司嘅资金，互相调配以提升集团整体资金嘅使用效率。例如A分支公司有闲钱，打算放喺银行赚些微嘅存款利息，而另一方面B分支公司唔够钱，准备向银行借贷，两间公司未必知道对方嘅资金状况，但CTC就可以通盘睇晒，将A公司嘅闲资借畀B公司，A公司就可以收到比存款利息高嘅回报，而B公司付出比银行借贷低嘅利息。就好似妈妈知你等钱使，与其你向外人借钱捱贵利息，佢就喺家用呢个资金池借畀你。
- 阿四：
- 香港系国际金融中心，有世界级嘅股票同债券市场、全球最大离岸人民币中心，加上我哋嘅司法同税务制度完善，好适合跨国企业嚟开设CTC喎！但点解推广CTC又关金管局事？
- 小森：
- 因为金管局其中一项主要职能系维持同提升香港国际金融中心嘅地位。其实唔少跨国企业将CTC同地区总部设置喺同一个地方，所以一旦拣咗嚟香港设立CTC嘅话，好大机会都将地区总部搬过嚟，为香港金融同周边行业带嚟更多就业机会，促进经济发展。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
