金管‧银禧──外汇基金大后盾

小森阿四專欄

2018年05月11日

金管‧银禧──外汇基金大后盾

阿四:
讲开金管局成立廿五周年,点可以唔提外汇基金。我听陈总裁成日讲,外汇基金一直都系香港金融同银行嘅强大后盾,究竟具体做过乜?

小森:
咁就要帮你温故知新啦。其实挤提、银行倒闭等事件系香港历史并不罕见,上世纪50至90年代就不时发生。例如80年代香港社会对前途问题好大焦虑,银行出现过倒闭潮、挤提潮,外汇基金先后动用过90亿元去拯救银行,维持银行体系。九七年爆发亚洲金融危机时,亦系由外汇基金向被挤提嘅银行提供280亿元债务担保,稳住市民对银行体系嘅信心。

阿四:
银行存款系市民嘅血汗钱,当然要好好保障。我知道二○○八年全球金融危机人心惶惶,外汇基金就出面为香港嘅所有银行存款提供百分百担保,市民当时即刻放心晒。香港金融体系能够安然渡过呢场危机,呢个担保都发挥咗稳定人心嘅作用。当时整个银行体系存款有6万亿,如果唔系有丰厚储备,都好难做到。

小森:
除咗为市民存款做后盾,仲有香港嘅金融市场㗎。例如八七股灾时,港股停市四日后,政府就透过外汇基金提供10亿元畀期货交易所做备用贷款,以防香港期货市场爆煲。一九九八年「打大鳄」时动用咗大约1,200亿入市,大家应该记忆猷新吧。

阿四:
政府将财政盈余放喺外汇基金收取投资收入。每年畀几多?

小森:
外汇基金会按「投资组合」过去六年平均回报率,计返派几多利息畀政府,而且保证回报唔低过零,可谓有赚无蚀。过去十年派畀政府嘅息近3,800亿元(见图)。另外,外汇基金亦有帮手管理其他政府基金(如关爱基金、语文基金等)同埋来自法定组织(如房屋委员会、医管局等)嘅存款,近十年派息加埋近700亿元㗎!由于外汇基金肩负稳定货币、银行及金融体系嘅责任,所以好大部分嘅投资都放喺低风险、高流动性嘅资产类别。虽然如此,我哋都做到长期增长,自成立以嚟,外汇基金嘅平均年度回报系4.9%,高于香港同期通胀嘅2.1%。

阿四:
原来孭咁重飞,真系唔好当佢一般投资基金咁睇。

  

                                                                   


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2018年05月11日