- 阿四：
- 金管局同私人财富管理公会合办嘅二○一八年度先导人才培训计划开始报名啦！上周六喺金管局举办招聘日，吸引约八百五十名同学现场参加。
- 小森：
- 咁多人有兴趣，同学点先可以突围而出？
- 阿四：
- 我同咗首届学员Robin倾过，佢嘅面试贴士系对热门嘅金融题目、金融产品要有基本嘅认识。仲有，唔好单睇银行个名去申请实习，而系要先了解银行嘅文化，同自己系咪夹得嚟。
- 小森：
- 点知道银行嘅文化系点？
- 阿四：
- Robin建议，同学可以同返紧心仪银行嘅师兄师姐倾吓偈，又或者睇吓银行网站嘅介绍。
- 小森：
- 仲有冇其他面试贴士？
- 阿四：
- 另一位首届实习同学Rensi就提醒有意申请计划嘅同学，唔好只系着眼银行前线嘅职位，而忽略咗银行中枱、后勤嘅工作机会。好似Rensi咁，今年暑假就曾经喺银行存款同埋合规部工作，令佢对私人银行运作有更全面嘅了解。
- 小森：
- 呢个计划特别之处，系畀同学融入真实嘅工作环境做学徒，近距离向私人银行家偷师，喺木人巷学真功夫。
- 阿四：
- 好似Robin咁，佢实习时唔怕丑同所有同事倾偈学师，连茶水姐姐都有两招醒佢。
- 小森：
- 一般大学生暑假实习职位只系为期一年，呢个计划两年嘅暑假咁长，同学要好有决心入行先得喎！
- 阿四：
- 无错，实习同学要喺两个暑假分别进行八星期嘅在职培训，如果喺大学二年级暑假开始实习，完成计划后，就有份私人银行工作等紧佢哋毕业返工㗎啦。实习期间仲有唔少于一万蚊嘅月薪㖭！
- 小森：
- 本地八间资助大学修读任何科目嘅学生，都欢迎申请呢个计划，十一月三十日截止报名，有兴趣就快手！
私人财富管理先导人才培训计划详情QR code
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
