- 小森：
- 有读者想我哋介绍多啲人民币业务呀！
- 阿四：
- 我知我知，而家人民币息高过港纸，我都有啲定期做咗！
- 小森：
- 唉，我哋读者好有水平，佢系想问下人民币国际化嘅工作。考下你，香港嘅离岸人民币系几时开始？
- 阿四：
- 2004年吖嘛！香港开始试办个人人民币业务，仲记得当年有每人每日兑换两万人民币嘅上限，到咗2014年沪港通开通，加上市场对人民币兑换需求不断增加，经过金管局同银行业界多年向内地争取，终于取消上限，可以喺离岸无上限兑换人民币。
- 小森：
- 离岸人民币业务已经由个人存户伸展到贸易同投资领域，呢两年随住沪港通、深港通开通，跨境投资亦唔再局限喺机构投资者，散户都有机会参与。成个过程下面幅图睇晒。
- 阿四：
- 我知道金管局喺金融基建方面做咗好多工作，去支持离岸人民币业务发展。
- 小森：
- 无错，香港离岸人民币市场可以运作得咁顺畅，甚至成为全球最大离岸人民币支付结算中心，金管局嘅人民币即时支付系统可以话系幕后功臣之一。呢个系统可以处理来自全球人民币业务参加银行嘅人民币结算，以及内地同香港嘅跨境支付，事实上，根据环球银行金融电讯协会（SWIFT）的数字，全世界有大约七成人民币支付交易系经香港处理。目前每日人民币即时支付结算成交约9000亿人民币咁多，仲多过港元即时支付结算(约6000亿)。就算交易咁繁忙，系统都从未甩过拖，算唔话得啦。
- 阿四：
- 仲有呀，金管局向市场提供人民币流动资金安排，每次当市场人民币供不应求，呢啲资金就系及时雨，稳住市场信心。
- 小森：
- 国际市场好多人民币产品定价，都系参考香港首创嘅利率基准㗎！
- 阿四：
- 仲有，金管局明年推出快速支付系统，市民只需一个手机号码或电邮地址，除咗港元仲可以畅通无阻咁用人民币支付㖭。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
