金管局变身哈佛教室

小森阿四專欄

2017年08月04日

金管局变身哈佛教室

阿四:
呢几日我喺公司都见到拎住哈佛大学书包嘅人,佢哋唔系嚟金管局返学呀?

小森:
咁都畀你估到!金管局基建融资促进办公室(IFFO)伙同哈佛大学肯尼迪政府学院(Harvard Kennedy School)与世界银行旗下嘅国际金融公司(IFC)合办一个公私营伙伴合作(Public-Private Partnerships, PPP)同项目投融资嘅高级研讨班。

阿四:
我知道而家趋势系愈来愈多基建项目用PPP,因为基建项目资金需求大,单靠政府有限资源去兴建,通过基建促进经济、改善社会民生就慢得多。私营机构参与既可大大增加资金来源,又能引入商业思维,有助减少大白象项目。

小森:
IFC联合哈佛举办呢个课程已经有九年。今年同金管局合作,系因为IFC睇到IFFO过去一年推动发展基建融资平台嘅成绩。IFFO亦希望透过课程提升业界对PPP和基建融资嘅认知同技能,所以一拍即合。

阿四:
呢个班读乜?

小森:
五日嘅课程会用哈佛嘅教法,用大量案例做分析,引发深入讨论。呢啲案例都系IFC有份参与嘅项目,好实用!

阿四:
我都想上呢个暑期班!

小森:
要有20年基建或相关范畴经验嘅行政人员先够资格。今次50位学生来自唔同国家,包括一带一路沿线地区,当中有机构投资者、发展及政策银行、基建项目营运商同发展商嘅高管、政府官员,仲有同IFFO工作相关嘅金管局同事,同埋IFFO嘅合作伙伴。

阿四:
难得大家嚟到金管局上堂,感受下香港基建融资平台嘅优点,又可以建立人脉网络,对学员日后做基建融资工作应该好有帮助。

金管局会议室变身成为课室,举行另类暑期班。
图片说明:金管局会议室变身成为课室,举行另类暑期班。

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2017年08月04日