《公平待客约章》

小森：

你听过《公平待客约章》（《约章》）未？

阿四：

系乜嚟？

小森：

金管局喺2013年推动制定约章，希望银行重视「以客为本」嘅精神，当时全港22间零售银行都签咗约章。而噚日就公布全港47间私人财富管理机构已经承诺履行约章，落实「以客为本」嘅精神。

阿四：

私人银行客户唔系全部都系有钱人？佢哋应该可以照顾到自己权益，点解仲要私人银行落实《约章》？

小森：

虽然私人银行客户嘅财富多过一般零售客户，但佢哋同样需要合适嘅保障。《约章》有五大原则，包括（一）服务同产品应该系根据客户需要而设计，而唔系单睇利润；（二）列明同清楚解释产品条款；（三）推广资料要准确易明；（四）向客户提供合理嘅投诉同申索渠道；（五）银行应该同政府合作推广金融教育。简单嚟讲就系无论做零售或私人银行生意，都要顾及客户权益。

阿四：

呢啲原则睇落都好虚！前线职员为咗跑数同花红就要sell客，边顾到咁多！

小森：

呢啲高层次嘅原则用字比较虚，系要留返啲空间畀银行管理层由虚入实，根据自己嘅企业文化同价值观制定具体指引畀员工去执行。

阿四：

金管局呢几年为推动香港私人财富管理行业嘅可持续发展做咗好多嘢，例如近期嘅「先导人才培训计划」吸引好多同学报名申请，本来20个实习名额，最终超额请咗29位同学。

小森：

客户将毕生积蓄交托银行系基于一份信任，所以银行要行「稳善之道」，除咗要有严谨嘅监管制度、良好嘅企业文化，仲要有合适嘅奖励制度去配合嘛！

阿四：

呢番话咁熟嘅？

小森：

陈总早排喺《汇思》写文讲嘅，有兴趣可以按以下连结睇返原文！
http://www.hkma.gov.hk/chi/key-information/insight/20170316.shtml

想问多啲有关金管局工作，欢迎电邮到小森、阿四专用邮箱：
88hkma@hkma.gov.hk