- 阿四：
- 我早排提议爸爸妈妈申请按揭证券公司嘅安老按揭计划，将佢哋住紧个单位抵押，每个月「有粮出」，点知佢哋好抗拒。
- 小森：
- 点解呀？安老按揭系好嘢嚟喎。
- 阿四：
- 佢哋担心百年归老之后，层楼被银行收咗，无得留返畀我。
- 小森：
- 世伯伯母好锡你喎！其实安老按揭只系透过按揭证券公司嘅安排，将层楼抵押畀银行贷款，而呢笔钱唔系一次过畀，而系分期甚至终身支付，世伯伯母仍然系单位业主。根据安排，佢两位唔喺度时，佢哋嘅继承人，亦即系阿四你，系可以优先赎返层楼㗎。
- 阿四：
- 赎回价格点计？
- 小森：
- 你只需清还两老喺安老按揭计划下嘅贷款总结欠，就可以赎楼。举个例子，假如贷款总结欠系二百万元，无论单位当时市值系几多，用二百万元就可以赎返楼。
- 阿四：
- 如果唔赎呢？
- 小森：
- 一般情况下，银行就会卖楼。假如两老的安老按揭贷款总结欠二百万元，银行卖楼收到八百万元，扣除贷款后净返六百万会畀返继承人。
- 阿四：
- 万一卖楼嘅钱唔够冚贷款额，咁点算？
- 小森：
- 按揭证券公司同银行之间有保险安排㗎嘞，唔会向继承人追收，所以唔使担心。
- 阿四：
- 我知道安老按揭计划嘅年金期分为十、十五、二十年或终身每月收钱。假设我父母拣咗十年，但十年后佢哋仲健在，佢哋系咪要搬走㗎？
- 小森：
- 唔使，即使年金派完都好，佢哋都可以喺抵押单位住到百年归老为止。其实已经有好多老友记用咗安老按揭计划，去年10月中放宽畀未补地价居屋、夹屋业主申请后，今年头两个月新申请按年都升咗超过六成。
- 阿四：
- 新一份财政预算案提到按揭证券公司会推出年金计划，都系畀老友记安享晚年，几时会推出㗎？
- 小森：
- 快㗎嘞，一有消息我哋再同大家分享。
图片说明：老友记参加安老按揭计划，可以每个月「有粮出」，都系一种唔错嘅安老选择！
安老按揭计划QR Code
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
