- 阿四：
- 上星期你讲到金管局资讯中心有件神秘展品，究竟系乜呢？
- 小森：
- 系一件用香港硬币砌出维港景色嘅马赛克作品，名叫「零钱唱」，系由十位香港艺术学院学生花咗好多心思，用咗大约半年时间制作。其中一位同学都喺度，不如一齐同佢倾几句。
- 阿四：
- 点解幅作品会叫做「零钱唱」？
- 同学：
- 散银又叫做零钱，「唱散银」调转嚟讲就系「零钱唱」。呢个名亦表达一个讯息，就系一啲本来不见天日、被放埋一边嘅硬币，当聚集埋一齐时就发挥到艺术嘅力量，「唱」出维港嘅新赞歌。
- 阿四：
- 咁你哋制作「零钱唱」最大困难系乜？
- 同学：
- 搵散银都几难㗎，因为幅作品好大，要用超过十万个「无添加」硬币嚟砌！为咗要突出到层次感，有些景物嘅厚度有成十五、六层硬币之多。我哋仲要用齐七种唔同面值的硬币，分成唔同色阶去加强对比效果，当中有啲硬币系全新、亦有半新旧、同埋非常残旧，有啲硬币甚至乎已经氧化咗而变埋色。我哋经常要「唱」一大堆硬币返嚟，仲要喺茫茫「钱」海中将硬币分类，真系少一分毅力都唔得。
- 小森：
- 你哋去边度搵一大堆硬币？
- 同学：
- 硬币来自金管局嘅收银车、银行、商铺、小巴等等，有同学仲用埋家人珍藏嘅硬币㖭。由于我哋唔可以人工上色，硬币颜色唔啱嘅话又要再「唱」过，所以我哋搵嘅硬币远远多过最后用到嘅数量。
- 阿四：
- 咁你哋咪成日袋住硬币周街行？
- 同学：
- 系呀！因为实在太重嘞，所以要用喼帮手，拖住咁多钱行街，都有啲担心安全㗎，每次都要搵几个人一齐帮手先得。
- 阿四：
- 「零钱唱」咁大块，一定好重嘞！
- 同学：
- 重二千几磅㗎！我哋系要分开九块去制作，完成后逐件搬嚟资讯中心先合成一块，安装个阵要特别小心，亦要再仔细补返接驳位。
- 阿四：
- 听你哋咁讲，制作「零钱唱」真系毫不简单！真系好想快啲见到件展品呀！
- 小森：
- 资讯中心2月24号重开啦！到时约埋去影相「打卡」。而家只要将影到「零钱唱」嘅相，或者同「零钱唱」一齐影嘅自拍照，上载到任何社交网站，并加入指定的hashtag，然后畀资讯中心服务台职员睇，就会有份纪念品。
- 阿四：
- 咁等我「打卡」share畀朋友睇先！
金管局资讯中心QR code
想问多啲有关金管局工作嘅题目，欢迎电邮到小森、阿四专用邮箱：88hkma@hkma.gov.hk
图片说明：香港艺术学院学生为「零钱唱」作最后冲刺
