- 阿四：
- 金管局每次公布调整基本利率时，都会提到「贴现窗」，究竟呢只系乜嘢窗？
- 小森：
- 贴现窗系一只金管局为银行提供短期流动资金嘅窗口。简单嚟讲，银行喺日终结算时，假如发现流动资金唔系咁足够嘅话，可以每日下午五点半至六点半通过呢个窗，将持有嘅外汇基金票据或债券做抵押，向金管局借取隔夜港元流动资金嚟进行银行同业结算。
- 阿四：
- 银行向其他银行借就得啦，点解要向金管局借呢？
- 小森：
- 系㗎，一般情况下银行都会透过同业之间嘅拆借解决资金需要，不过有时个别银行一时之间未必能够喺同业之间完全借得晒所需要嘅资金都唔出奇，贴现窗可以畀银行多一个途径借入隔夜资金。
- 阿四：
- 咁贴现窗利息又点计？
- 小森：
- 银行经贴现窗向金管局借钱，金管局向银行收取嘅利率就叫做「贴现率」，系用「基本利率」计算。「基本利率」系根据一条公开透明嘅公式计出嚟，就系按「美国联邦基金利率」目标区间下限加50点子，或者隔夜同1个月香港银行同业拆息5天移动平均数嘅平均值，以较高者为准。就好似最近一次，美联储喺9月加息25点子，金管局就宣布上调「基本利率」25点子至2.50厘。
- 阿四：
- 哦，原来是咁的，我明啦。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
