点解要银行审慎贷款?

小森阿四專欄

2018年11月23日

点解要银行审慎贷款?

阿四:
近排资产市场下跌,中美又爆贸易战,加上有零星内地企业借贷违约嘅新闻,会唔会影响到香港银行体系㗎?

 

小森:
唔使咁担心,金管局一向关注银行有冇用审慎原则批核贷款,包括有冇足够资料了解借款人嘅背景、还款能力、现金流,以及借款用途等。另外,金管局亦会睇实银行呆坏帐嘅情况,有需要时会要求妥善处理,例如追收、拨备或者冲销,唔会容许呆坏帐累积。呢啲审慎批核贷款嘅原则适用于所有银行贷款㗎。

 

阿四:
咁香港银行向内地企业贷款嘅情况系点?

 

小森:
今年六月底止,内地相关贷款大约占香港整体贷款约45%,同往年都差唔多。我知负责银行监理嘅同事都睇到实,虽然曾经出现个别内地企业债务违约,但未有扩散迹象。事实上,今年上半年香港零售银行嘅不良贷款比例系0.53%,全球主要银行体系中属极低嘅水平。

 

阿四:
金管局要继续关心银行信贷质素,毕竟银行贷款出去嘅资金,绝大部分来自市民嘅毕生积蓄。如果银行乱咁借钱收唔返而倒闭,会连累到好多无辜嘅存户血本无归。外围经济咁多不明朗因素,银行监理部嘅同事真系面对几大挑战,不过佢哋一定会继续努力,做好保护存户嘅工作。

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年11月23日