- 阿四：
- 唔明唔明！
- 小森：
- 你唔明乜呀？
- 阿四：
- 我啱啱去银行汇钱，唔知点解有唔同嘅收费项目！例如「代理银行」费用、用唔同货币有唔同收费、喺汇款指示加上畀收款人嘅备注又有可能要收费。仲有查询汇款情况、取消汇款等费用，有啲可能收一、二百蚊。我以为去银行汇款只系收一种手续费，真系收费不似预期！
- 小森：
- 始终每笔汇款嘅细节有唔同，未必可以有一种收费包括晒所有情况。其实好多银行都已经将汇款嘅收费放上网页，你可以喺办理汇款前睇下，等自己有个预算。同埋最好喺办理汇钱前，向银行职员问清楚汇款所需程序同大概收费。
- 阿四：
- 我唔明点解银行办理海外汇款要搵「代理银行」？客人可唔可以搵指定嘅「代理银行」呢？
- 小森：
- 因为银行好难同全球所有金融机构都有直接联系，所以需要有「代理银行」做中间人，协助客人将资金汇去当地收款银行。为了令有关海外汇款可以妥善办理，每间银行同佢用嗰间「代理银行」一般都会互相开立帐户做往来交收、交换认证、订明授权安排等，唔系临时拉夫就可以做「代理」。客人想搵某啲银行做海外「代理银行」嘅话，都要先问下汇款银行有无同嗰间「代理银行」有联系先得，无嘅话，就真系无法做到啦。
- 阿四：
- 另外我又唔明，我问银行职员最终「代理银行」同收款银行要收几多费用话答唔到；问笔钱可以几时汇到收款银行，佢只系答到我「一般嚟讲」要收费几多同要等几耐，咁都得？
- 小森：
- 好似头先咁讲，海外汇款往往要经「代理银行」处理，有啲同香港较少联系嘅地区，甚至可能要用几间「代理银行」。再加上时差、银行截数时间不同等因素，所以银行职员真系好难畀到一个确实收费同时间你，唔系耍你㗎。
- 阿四：
- 原来咁复杂，真系唔讲唔知！
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
