银行资金时刻畅通嘅幕后功臣──RTGS系统

小森阿四專欄

2018年09月14日

银行资金时刻畅通嘅幕后功臣──RTGS系统

阿四:
人体血管将养份输送到身体各部位,咁你知唔知银行体系点样输送资金?

 

小森:
我估你讲紧啱啱开会提到嗰个RTGS系统,全名系Real Time Gross Settlement系统(即时支付结算系统),系香港金融基建最重要骨干。金管局喺1996年推出港元RTGS系统,畀银行业一个高效、安全、简便嘅平台进行同业之间嘅支付结算。除咗银行之间嘅大额支付项目外,RTGS系统仲会处理同我哋日常生活相关嘅支付,例如支票、股票买卖、自动柜员机转帐等嘅资金往来。你日日用紧唔多觉,但无咗佢就好大件事!

 

阿四:
RTGS系统咪好忙?

 

小森:
现时RTGS系统平均每日交易金额大约9,200亿元,仲多过香港2017年第四季GDP(约7,200亿元)。2017年全年港元RTGS系统成交额大约260万亿元,差唔多系全年GDP嘅130倍。

 

阿四:
原来RTGS系统帮香港处理咁多钱银交收!

 

小森:
呢个系统等如银行血脉,如果唔畅顺,轻则增加银行嘅流动资金压力,造成利率飙升,严重嘅话甚至令银行停止运作。庆幸嘅系,RTGS系统运作廿几年嚟,由港元开始,之后支持埋美元、欧元同人民币,都一直「零意外」,为香港嘅金融稳定默默作出贡献。

 

阿四:
哦,我终于明白点解头先开会讲RTGS系统!因为下星期公布推出嘅「快速支付系统」就系RTGS系统嘅加强版,会打通电子钱包、银行户口之间嘅阻隔,以后市民只需要一个电话号码或电邮地址,就可以透过「快速支付系统」即时收到转帐款项。

 

小森:
以你转数嚟讲,都理解得好快,下星期我哋再讲多啲呢个系统有几劲。

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年09月14日