- 小森：
- 阿四，你今日个样唔同咗嘅？
- 阿四：
- 嘘，细声啲。我换咗个look准备乔装成银行顾客去帮金管局进行「乔装顾客检查计划」，了解银行喺提供产品同服务时嘅手法。
- 小森：
- 金管局由2010年推出呢个计划，希望以客户第一身体验了解银行嘅营运手法。每次抽查嘅范畴都有唔同，例如开银行户口、销售投资产品同保险产品。呢个计划嘅乔装顾客都系受过培训，唔系你换个look就做得。佢哋要识得问啱问题、畀合适嘅反应、记低银行职员讲过乜，仲要小心保持神秘身份，好讲技巧㗎。乔装完后仲要填写问卷，方便整理同分析资料。
- 阿四：
- 咁搵乜人做乔装顾客？
- 小森：
- 乜人都有！为咗令抽查结果更有广泛代表性，乔装顾客会来自唔同年龄层、种族、教育背景同财政状况等。
- 阿四：
- 「乔装顾客检查计划」做完有乜用？
- 小森：
- 金管局之前做嘅「乔装顾客检查计划」，发现个别银行同职员嘅投资同保险产品销售手法仍有改善嘅空间，于是我哋就要求有关银行采取适当嘅跟进措施，包括加强相关管控和员工培训。我哋仲将抽查结果同银行业界分享，提醒返佢哋要遵从适用嘅监管规定同预期标准。我哋亦会根据检查计划嘅结果，同埋我哋喺监管过程中所发现嘅其他情况，向银行发出相关嘅指引㖭。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
