金管局如何处理对银行的投诉?

小森阿四專欄

2018年08月10日

金管局如何处理对银行的投诉?

阿四:
唉!一阵又要落银行搞投诉。分行经理话同我跟,但一直无消息。

 

小森:
如果你唔满意银行处理投诉,可以搵金管局帮忙喎。

 

阿四:
可以点做㗎?

 

小森:
你可以喺专用表格填写个人资料同投诉内容,再签妥同意书交畀金管局。千祈唔好签漏同意书,因为金管局要得到你嘅同意先可以用你嘅个人资料同银行跟进。呢份表格可以喺金管局网站「有关银行产品或服务的投诉」一栏搵到,又或者打我哋投诉热线(28781378)索取。嗰度仲有份「银行处理客户投诉联络人名单」,你可以搵返专责处理投诉嘅银行职员直接沟通,之后再决定系咪去金管局投诉。

 

阿四:
咁金管局系点样处理投诉㗎?

 

小森:
同事会先检视投诉嘅内容。有啲个案会先责成银行处理,畀投诉人一个详尽嘅书面回覆。假如涉及到操守或监管上嘅问题,而又有表面证据嘅话,金管局就会采取进一步跟进,包括立案调查。

 

阿四:
即系如果证明银行犯错,金管局就可以指令银行赔偿?

 

小森:
金管局会检视银行处理该个案同投诉方法,但法律上,金管局作为监管当局并无权就银行同客户之间嘅纠纷直接仲裁或指令银行作出赔偿。但如果双方无法和解,可以考虑搵「金融纠纷调解中心」帮手。

 

阿四:
咁金管局可以做啲咩?

 

小森:
银行投诉有好多种,而金管局跟进处理嘅方法亦因而有所不同。例如曾经有市民被自动柜员机「食卡」,但贴喺柜员机上嘅电话号码接咗去柜员机公司嘅技术支援组,事主要「几经波折」先搵到银行职员协助。金管局跟进后,银行就将客户热线电话贴喺柜员机旁,市民方便好多。

金管局「有关银行的投诉」网页二维码

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年08月10日