- 小森：
- 阿四，我成日醒你一啲使用银行服务嘅精明贴士，今次就讲下点样负责任咁使用银行服务。
- 阿四：
- 精明就够啦，点解要负责任呢？
- 小森：
- 「精明」系识得拣更好，「负责任」其实只系对自己负责，即系识得保障自己多啲，两者相辅相成。金管局一直推广消费者教育工作，希望大家识得做个精明又负责任嘅银行服务消费者。
- 阿四：
- 使用银行服务要负咩责任？
- 小森：
- 首先银行客户有责任妥善使用网上银行、电话理财同柜员机等银行服务，包括好好保管手机同电脑，好好保管同定期更新密码，唔好用同其他网上服务一样嘅密码。随意记录密码喺纸或电脑，或者用「123456」呢类好易被撞中嘅密码，其实等如将屋企夹万锁匙周街放一样咁儿戏。
- 阿四：
- 所以我经常睇实由银行发出嘅手机短讯同通讯，收到月结单时必定尽快查核所有交易纪录，睇下有冇未经授权交易。
- 小森：
- 第二就系有责任妥善保管个人资料。骗徒会出尽千方百计，譬如利用申请低息贷款、招聘等借口，氹人交出身份证、住址证明、入息证明、银行帐户资料、签名式样、甚至你张相等，然后作不法用途。
- 阿四：
- 仲有签任何文件前都要睇清楚。
- 小森：
- 另外，客户进行银行交易，例如喺柜员机过数时应该小心核对输入嘅收款帐号同埋银码正确无误，免得日后追讨起嚟费时失事。假如真系大头虾入错数，就要尽快搵银行协助，若对方不合作或拒绝归还款项，就要考虑报警。仲有，如果发现自己户口收到不明来历嘅存款，千祈唔好贪心，一定要立即通知银行处理，否则有机会负上刑事责任。仲想知多啲，可以去金管局网站嘅消费者资讯专区睇睇！
消费者资讯专区二维码
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
