终身年金出台!

小森阿四專欄

2018年07月13日

终身年金出台!

阿四:
期待已久嘅香港终身年金计划终于嚟啦,但我畀我爸爸问到口哑哑!

 

小森:
世伯问咗乜咁难答?

 

阿四:
佢听人讲,年金计划唔可以对冲通胀!皆因年金每月定额「出粮」,今日收五千蚊、十年后又系收五千蚊。仲有专家话买股收息、买楼收租嘅回报仲好过买年金。

 

小森:
年金系保险产品,用嚟缓解「长寿」风险,而买股买楼系投资,性质不同。买年金嘅好处系由你投保个日就清楚每个月有几钱保证落袋,直至百年归老。相反,上市公司唔一定年年派息,物业亦唔担保租得出。而且两者价格可升亦可跌,收息收租都无写包单追到通胀。讲到底,最重要系了解自己退休后嘅理财需要。

 

阿四:
我爸爸又话,六十五岁男士买年金要十年先回本,即系话头十年累积收取嘅年金加埋保单嘅保证现金价值就会同本金打和,之后收嘅年金先算系「回报」。佢又听人讲话做定期更好,假设活期息2.15%,利叠利15年后,回报比年金更可观!

 

小森:
我解畀你听:假如世伯有$100万,用返你讲嘅息口,而每月支出$5800,世伯喺17年后即82岁就会用晒呢笔钱,坐食山崩;而终身年金喺15年后累收总回报$105万(105%),但最最最重要系世伯无论活到几多岁,每个月保证收$5800,一个仙都唔会少!不过有一点必须注意,终身年金要一笔过投保,中途退保同其他保险产品一样会有损失,所以,一定要注意流动性,以备不时之需。

 

阿四:
有啲复杂,我都唔识计畀爸爸睇。

 

小森:
香港年金公司网站 www.hkmca.hk 都准备咗年金计算机,上去揿下就清楚。话时话,如果世伯投资真系好叻或者完全唔担心「长寿风险」,终身年金未必啱佢㗎!

注:现时主要零售银行活期息率介乎0.001%至0.02%

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年07月13日