- 小森：
- 你喺度睇紧乜相？
- 阿四：
- 早几日「深圳金融科技暑期实习计划」启动礼影嘅相之嘛。个日场面好热闹，除咗有香港金管局、内地官员同实习机构代表外，仲有50名参加实习计划嘅香港大专学生出席。
- 小森：
- 我记得！呢个系首个由金管局同深圳金融办合办嘅fintech实习计划。获选嘅香港大专学生分别会去深圳8间顶尖嘅金融科技或科技金融公司实习6个星期，体验深圳嘅fintech生态！
- 阿四：
- 听讲呢个实习计划甄选方法都几特别㗎，先由大专院校嘅老师提名有潜质嘅学生。佢哋除咗要填表格之外，仲要用普通话拍一段短片介绍自己。今年收到200几个提名，最后50位同学脱颖而出。
- 小森：
- 我都记得一啲科技人才结合深港优势嘅成功故事，例如全球航拍一哥「大疆」创办人兼行政总裁汪滔讲过，如果佢无去香港读大学，就无而家嘅成就。香港系国际金融中心，深圳又汇集了顶尖科技专才同雄厚嘅工业实力，携手合作发展fintech真系无得输。
- 阿四：
- 乜你记得咁多嘢嘅。
- 小森：
- 我仲记得你借我部相机影深港交流活动，用完好还返畀我呀。
图片说明：金管局副总裁李达志（右二）与首届深圳金融科技暑期实习生交流
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
