点止得艺术嘅巴塞尔

小森阿四專欄

2018年06月22日

点止得艺术嘅巴塞尔

 

阿四:
小森,同事飞去巴塞尔(Basel)开会喎,每年Art Basel就话吸引好多人去「朝圣」,但点解金管局成日都要去个度开会?

 

小森:
巴塞尔系瑞士第三大城市,系金融同文化重镇嚟㗎!国际结算银行(Bank for International Settlements)嘅总部就设喺巴塞尔,十国组织(G-10)喺1974年成立咗「巴塞尔银行监理委员会」(巴塞尔委员会),都会定期喺国际结算银行开会,负责制定指引同金融监管标准,系「央行」嘅「央行」。金管局分别喺1996年同2009年加入国际结算银行同埋巴塞尔委员会,系佢哋嘅成员。

 

阿四:
另外,二十国集团(G-20)喺2009年成立嘅「金融稳定理事会」(FSB)嘅秘书处亦设于国际结算银行。

 

小森:
金管局陈总被委任担任FSB辖下监督合作常设委员会(SRC)嘅主席㖭,2年任期由旧年4月开始。SRC制定与金融稳定相关嘅监管政策,促进监管机构就跨辖区监管问题合作。金融稳定理事会邀请陈总领导SRC嘅工作,反映咗香港健全嘅银行体系广受认可,亦体现香港作为国际金融中心对全球金融稳定嘅贡献。

 

阿四:
唔怪得金管局陈总同同事不时都要飞去巴塞尔,原来有咁多国际金融组织会议要开。

 

小森:
唔系去「开个会、吹吓水」咁简单㗎,而系真喺有好多实质嘢做。喺银行监管方面,金管局会同其他监管机构一齐制定一啲国际监管标准。好似金融海啸之后制订嘅《巴塞尔协定三》咁,要经过多年嘅讨论先至喺「资本充足率、压力测试、流动性风险」各方面达成协议。有咗国际标准,金管局仲有好多后续嘅立法工作,确保香港同国际接轨,巩固国际金融中心嘅地位同竞争力。

 

金管局同事经常飞去巴塞尔嘅国际结算银行总部开会(图片来源:国际结算银行)
金管局同事经常飞去巴塞尔嘅国际结算银行总部开会(图片来源:国际结算银行)

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年06月22日