区块链唔止虚拟商品咁简单

小森阿四專欄

2018年04月27日

区块链唔止虚拟商品咁简单

 

小森:
阿四,我旧年喺度用打麻将嘅比喻,同你讲解区块链(blockchain)点运作,估唔到呢一年区块链发展得咁快,而家无乜人未听过区块链啦。

 

阿四:
可惜唔少人都以为区块链即系虚拟商品哩!谈论重点通常系边只有得「炒」。其实区块链嘅应用非常广泛,虚拟商品只系芸芸众多应用区块链技术产品之一。

 

小森:
无错。区块链嘅本质系记帐簿,凡系需要「扎低」资料嘅地方,就用得上呢个技术。只不过因为虚拟商品见报率高,所以大家忽略区块链其他嘅应用潜能。

 

阿四:
除咗之前讲过应用喺楼宇按揭、贸易融资外,我听专家讲,区块链仲可以用喺食物供应方面 :一棵菜由生长、收割、经过批发商、零售商再卖畀消费者,用区块链记录整个流程嘅话,中间有人想窜改食物嘅来源都好难,有助提高食物安全。联合国亦研究运用区块链技术推出无国界嘅数码身份,以解决难民离开家园后,失去原先嘅身份认证嘅问题。仲有呀,澳洲有个先导计划,畀市民利用区块链嚟「扎低」互相买卖自家生产嘅太阳能或风力电源嘅帐目。

 

小森:
有啲料到喎!区块链专家你都识。

 

阿四:
我上星期参加咗由金管局同数码港合办嘅「金融科技O2O」聚会,听咗几位专家分享区块链最新发展,学到唔少嘢。今次已经系金管局金融科技促进办公室第三次举办「金融科技O2O」聚会,每次都会邀请重量级人物演讲,同埋设有交流环节畀银行同科技界多啲互动同沟通,深受业界欢迎。
 

图片说明:金管局最近同数码港合办「金融科技O2O聚会」,座无虚席。

图片说明:金管局最近同数码港合办「金融科技O2O聚会」,座无虚席。

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年04月27日