- 阿四：
- 近排睇新闻讲金管局已经多次「接钱」，其实点解？
- 小森：
- 金管局「接钱」系联汇制度设计嘅一部分。所谓「接钱」，即系金管局会透过银行喺外汇市场买港元、沽美元，保证港元汇率不会弱于7.85的弱方兑换保证。当资金逐步流出，银行体系结余会逐步减少，港息会慢慢上升，利率正常化其实系好事，亦系金管局乐见嘅！
- 阿四：
- 但啲人话港汇跌到33年以来新低，会唔会再跌落去架？
- 小森：
- 唔会。根据联汇机制，金管局会「包底」买入港元，保证港汇唔会跌穿7.85呢个位。香港系国际金融中心，大量资金经常进出，你可以当金管局系「超级找换店」，喺强方或弱方兑换保证被触发时，会买美元或买港元，维持港元汇价喺7.75-7.85，所以触及任何一边都系好正常嘅运作。
- 阿四：
- 咁大鳄几时会打到嚟？
- 小森：
- 今次港汇转弱并唔系有大鳄狙击，只系来自息差套戥，因为港美息差有成一厘，吸引资金在市场沽港元、买美元去赚息差。陈总裁成日都话香港银行体系稳定系重中之重，银行和金融体系的抗震能力比1997年已经大幅提高，加上外汇基金有成超过4万亿港元的资产，银行体系流动性又极之充足，咁多弹药，梗系冇有怕啦！
- 阿四：
- 咁又系，香港喺2008年全球金融危机同2011年欧债危机都安然度过，就知我哋根基唔错啦！
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
