股票挂鈎产品

小森阿四專欄

2018年01月19日

股票挂鈎产品


阿四:
小森,呢排股市升得咁急,你话股票挂鈎产品,好似股票挂鈎票据(Equity-linked Note)同股票挂鈎存款(Equity-linked Deposit)买唔买得过呢?

小森:
股票挂鈎产品系结构性投资产品,投资条款比较复杂,我担心你唔知自己买咗乜咋喎。

阿四:
唔使担心喎,我已经睇晒喺银行攞嘅产品销售单张。嗱,如果我买10万蚊某大蓝筹嘅ELN,假设当时呢只股票嘅股价系100蚊,行使价系90蚊。如果喺ELN埋单个日,股票收市价高过行使价90蚊,我就收取本金10万蚊再加由银行派发嘅回报;相反,如收市价低过行使价嘅话,我就用90蚊买入10万蚊等值嘅股份。断估大蓝筹股价短期内应该唔会跌超过一成啩,赢面好似好大!

小森:
阿四,近嚟嘅升市好似令你忘记咗几次金融危机嘅教训咁喎。大围市况波动起嚟,边个保证蓝筹股价唔会大幅波动㗎?

阿四:
唓,真系咁唔好彩嘅话,我都系接股票啫,咪当趁低吸纳、长线投资罗!输极有个谱。

小森:
咁你就低估咗挂鈎产品嘅风险喇!如果ELN埋单个日,股价跌到50蚊,你都要被逼用90蚊「高价」接货,即刻「坐艇」,点会系趁「低」吸纳呀!仲有,即使挂鈎股票嘅市价高过行使价,你嘅投资回报亦可能只限于ELN预设嘅上限;相反喺最坏情况下,你可能会蚀晒全部本金,例如ELN发行商或者嗰间上市公司执笠,随时系连投资本金都收唔返。你有冇心理准备承受本金变零嘅风险呢?你预期收到嘅回报,系咪抵销到咁大损失嘅风险?

阿四:
即系有机会赢得少、输得多。睇嚟我都系做多啲功课,谂清楚先至决定喇。



想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2018年01月19日