借税贷前睇一睇

小森阿四專欄

2017年12月15日

借税贷前睇一睇


阿四:
小森,好快又要交税,好多间银行都推出税贷,有啲仲话低过一厘,好似好so喎!

小森:
税贷系私人贷款嘅一种,还得到先好借,唔系净睇息率高低。

阿四:
借税贷有咩地方要特别注意?

小森:
好似你咁讲,税贷息率睇落都好低,但唔系每个客都可享低息,银行批出低息税贷时会考虑好多因素,例如贷款额系几多、借款人系咪新客户、有冇同时申请信用卡、有冇喺银行开咗出粮户口,或者借款人系咪专业人士等,所以未必好似广告所讲咁低息。 

阿四:
贷款息率好复杂,一时又话每月平息,一时又话实际年利率,究竟睇边个先啱?

小森:
确系唔易睇,因为有啲贷款平息息率低,但另外收取较高手续费,仲会喺贷款额扣除,所以识睇梗系睇已经包括手续费嘅实际年利率(APR)。除手续费外,如有现金回赠/优惠(例如利息回赠及利率削减),银行亦可以同时计埋入APR里面,但就唔应该包括例如超市、其他商铺现金赠券等呢类实物利益。

阿四:
如果计埋现金回赠/优惠,咁个APR咪会变低咗?

小森:
系呀,但现金回赠/优惠并非必须计算喺APR内。若个别银行将现金回赠/优惠计算在APR内,应同时提供有关回赠/优惠不适用时嘅APR,畀客户准确咁比较返。每间银行推出零售贷款产品都要提供APR准确咁反映实际借贷成本,等客户参考同比较唔同银行嘅贷款计划,选择最适合自己嘅贷款。

阿四:
呢排股市咁热,借税贷炒股票咪好好搵。

小森:
万一买咗嘅股票一时变现唔到就压住贷款,仲有冇足够能力每个月还款?而且投资唔系必赚㗎,万一股价不似预期,蚀咗税贷本金,仲要畀贷款利息㖭!



想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年12月15日