- 阿四：
- 金管局每年为高中学生举办嘅公众教育讲座开始咗啦，听闻今年仲加开一场，总共有四场。
- 小森：
- 无错，以往分别喺港岛、九龙同新界各开一场，今年反应热烈，喺九龙连开两场，希望畀更多同学同老师参与。
- 阿四：
- 呢个讲座讲啲乜㗎？
- 小森：
- 公众教育讲座自一九九八年已经开始举办，畀同学更直接咁了解金管局嘅工作，同埋增进相关嘅金融知识，好似联系汇率和香港钞票都系讲座嘅重点。我哋亦会因应每年最新发展，加入唔同嘅专题。前几年就加咗银行监管和消费者教育等内容，今年就有关于金融科技、基建融资同金融业就业前景嘅讨论。不得不提，我哋今年仲首次邀请到香港银行学会嘅代表，介绍银行业就业前景。
- 阿四：
- 讲座内容都几与时并进喎。不过啲题目听落咁深，中学生听唔听得明？
- 小森：
- 同事喺讲座前俾咗好多心机去预备，内容都尽量同学生嘅学习内容或日常生活息息相关，又透过好多日常例子，配合浅白语言，希望尽量做到深入浅出。今年讲座嘅表达方式都有所不同，同事再唔系喺台上「独唱」，而系透过对答同埋小组讨论，仲会不时出问题考下台下同学，而同学都好积极回答，整体气氛几互动㗎。
- 阿四：
- 听落真系几精采喎！
- 小森：
- 系呀，喺首两场讲座之后，我哋收集咗不少老师同学嘅意见，大部分都认为讲座加深咗佢哋嘅金融知识，有助佢哋日后嘅应用甚至将来就业。
- 阿四：
- 每年讲座有几多人出席？
- 小森：
- 每年大约有二千位同学同老师出席。自一九九八年推出以嚟，累计已有超过五万六千人参与。
- 阿四：
- 如果对呢个讲座有兴趣，可以点样报名？
- 小森：
- 金管局每年会向中学寄邀请信。错过咗今年讲座？唔紧要，老师可以电邮畀我哋，安排出席下年讲座。同学亦可以嚟参观金管局位于中环国金2期55楼嘅资讯中心。
图片说明：金管局公众教育讲座今年加咗丰富嘅内容，让同学获得最新嘅金融知识。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
