香港电子支付好落后?

小森阿四專欄

2017年11月17日

香港电子支付好落后?


阿四:
香港电子支付真系落后!内地消费好多已经用手机畀钱,乞儿都识用QR code讨钱啦。

小森:
香港廿年前就已经有唔同电子支付选择喎。信用卡、扣帐卡、八达通等,好多地方都用到。香港人最识拣,大额消费就碌信用卡储积分,想快个阵就用八达通。你讲嘅手机支付,不论本地、内地或海外嘅主流电子钱包,而家喺香港一样用到,又点算落后。

阿四:
呢排个个都话要「无现金」,香港唔应该跟咩?

小森:
平时偶有商户唔收毫子、金牛,大家都好大反应,如果「无现金」极端到所有商户唔收现金,对市民嚟讲实在好唔方便。瑞典「无现金化」到连银行都唔接受现金提存,要当地央行研究有冇需要强制提供现金服务㖭。

阿四:
但内地搭的、街市买餸已经用手机支付,又似乎好方便噃。

小森:
你想像一下,如果香港只系收本港电子支付工具,港纸都唔收,每年访港嘅几千万游客点算?

阿四:
你又啱。电子支付又好、现金又好,最重要系消费者有得拣,先至算方便。

小森:
所以,金管局希望促进香港发展一个多元、方便、安全嘅电子支付生态,同时兼容现金支付。

阿四:
话时话,香港人要有内地银行户口同手机号码,先可以喺内地用到手机钱包,几时先可以简单啲,香港电子钱包直接喺内地支付?

小森:
金管局一班同事正系好努力同支付营运商倾紧,畀啲耐性等等啦。

 

 


想问多啲有关金管局工作,欢迎电邮到小森、阿四专用邮箱:
88hkma@hkma.gov.hk



最新小森阿四專欄
修订日期 : 2017年11月17日